Miratohen vendime me rëndësi në mbledhjen e katërt të Kuvendit Komunal në Kamenicë

Kamenicë – Kuvendi Komunal në Kamenicë ka mbajtur mbledhjen e katërt të rregullt, ku janë shqyrtuar dhe miratuar një sërë pikash me rëndësi për funksionimin institucional dhe zhvillimin lokal. Mbledhja u drejtua nga kryesuesja Arbnore Beqiraj-Fera, ndërsa të pranishëm ishin kryetari Kadri Rahimaj, nënkryetarja Arta Bajralija, asambleistë, drejtorë komunalë, përfaqësues të OJQ-ve dhe të tjerë.

Fillimisht u miratua procesverbali i mbledhjes së kaluar, ndërsa në vijim u zhvillua seanca e pyetjeve të legjislativit drejtuar ekzekutivit. Një nga pikat kyçe ishte shqyrtimi dhe aprovimi i raportit financiar buxhetor për periudhën janar–mars 2026, i cili pasqyron ecurinë e shpenzimeve dhe të hyrave komunale në tremujorin e parë të vitit.

Asambleja miratoi gjithashtu vendimin për ndarjen e mjeteve financiare për punëtorët e NPL “DARDANA” SH.A, si dhe vendimin për dhënien në shfrytëzim të një prone komunale për Policinë e Republikës së Kosovës. Në kuadër të reformave administrative, u aprovua edhe rregullorja për organizimin e brendshëm dhe sistematizimin e vendeve të punës në komunë.

Ndër vendimet e tjera të rëndësishme ishte formimi i Komisionit Komunal të Aksionarëve për PPP “Ecohigjena”, falja e borxheve të papaguara për shfrytëzimin e hapësirave publike, si dhe emërtimi i sheshit “Metush Krasniqi”. Po ashtu, u plotësua lista rezervë për emërtimin e rrugëve dhe hapësirave publike.

Gjatë mbledhjes, kryetari Kadri Rahimaj propozoi tri pika shtesë, të cilat u përfshinë në rend dite dhe u miratuan: rekomandimi për ndarjen e çmimit “Emblema e Kamenicës” për Faruza Kallaba, bashkëfinancimi i një projekti për rehabilitimin e varrezave në Karaçevë e Epërme, si dhe miratimi i draftit të punës së Këshillit Komunal për Siguri në Bashkësi për vitin 2026.

Të gjitha pikat e rendit të ditës, përfshirë ato shtesë, u miratuan me shumicë votash, duke reflektuar një konsensus të gjerë politik për çështjet kyçe të komunës./rajonipress/