Ministria e Zhvillimit Ekonomik i takon AKR-së

Sekretari i Aleancës Kosova e Re (AKR), Ibrahim Makolli beson se finalizimi i marrëveshjes për ndryshimet në Qeveri do të ndodhë shumë shpejt dhe se Ministria e Zhvillimit Ekonomik do të qeveriset nga AKR-ja. Për këtë, sipas tij, tashmë janë pajtuar kryetari i PDK-së, Hashim Thaçi dhe presidenti i AKR-së, Behgjet Pacolli.

Në një intervistë për “Tribunën”, Makolli ka thënë se shtyrja e deritashme e marrëveshjes për ndryshimet në qeveri nuk ka ndikuar në prishjen e raporteve në mes të partnerëve në koalicion. Duke folur rreth përpjekjeve që Ministria e Diasporës po bën në organizimin e mërgatës, Makolli ka shpjeguar se kjo ministri është duke hartuar një strategji pesëvjeçare.

Ai ka thënë se po bën përpjeke që tash e tutje mërgata të këtë të drejtë që në zgjedhjet e ardhshme të zgjedhë dhe të jetë e zgjedhur, duke pasur mundësi që mërgimtarët të votojnë në shtetin në të cilin jetojnë dhe veprojnë. “Ne tani jemi duke punuar edhe me dikasteret e tjera që e drejta për të votuar t’i ofrohet mërgatës sonë edhe në vendin ku jeton. Kjo i bie që të organizohen zgjedhjet edhe në vendet ku jetojnë ata, në mënyrë që të realizohet kjo e drejtë kushtetuese”, ka thënë Makolli.