Ministria e Diasporës dënon sjelljen e autoriteteve kufitare serbe

Prishtinë – Ministria e Diasporës ka reaguar sot lidhur me sjelljen e organeve kufitare serbe në pikëkalimin në Merdare.

“Ministria e Diasporës është njoftuar sot nga Policia e Kosovës se autoritetet e Serbisë kanë shkaktuar sërish tollovi në pikëkalimin kufitar në Merdare. Sipas njoftimeve të bashkatdhetarët tanë që shfrytëzojnë këtë pikëkalim, autoritetet kufitare të Serbisë pa asnjë arsye po zvarritin punën e tyre, duke shkaktuar pritje të gjata, me orë të tëra.

Edhe një herë vlerësojmë se me këtë sjellje jo demokratike Beogradi zyrtar po tregon se vazhdon të vuaj nga komplekset e të kaluarës.

Ministria e Diasporës dënon një sjellje të këtillë të autoriteteve kufitare të Serbisë dhe u bënë thirrje të gjithë mekanizmave ndërkombëtarë që të ndikojnë tek institucionet e Beogradit për t’iu mundësuar lëvizjen e lirë dhe të papenguar, që është pjesë e parimeve demokratike evropiane”, thuhet në reagimin e kësaj ministrie.