Miliçeviq: Ndarjen e veriut s’e përkrah asnjë serb në jug

Drejtori ekzekutiv i organizatës joqeveritare “Aktiv”, Miodrag Miliçeviq, në një intervistë për gazetën “Zëri” ka thënë se ndarjen e veriut nuk e mbështet asnjë serb që jeton në jug të Ibrit. Sipas tij, një ndarje e tillë nuk është qëllim përfundimtar i qeverisë së Serbisë, por është një skenar i mundshëm për ta shmangur humbjen e plotë në procesin e negociatave, shkruan sot Gazeta “Zëri”.

Ndarja e veriut të Kosovës nuk është qëllim përfundimtar i Qeverisë së Serbisë, por është një skenar i mundshëm që do t’i mundësojë ekzekutivit në Beograd ta shmangë humbjen e plotë në procesin e negociatave.

Kështu ka vlerësuar drejtori ekzekutiv i organizatës joqeveritare “Aktiv”, Miodrag Miliçeviq, gjatë një interviste për gazetën “Zëri”.

Ai pranon se një ide e tillë është ringjallur në skenën vendore dhe ndërkombëtare e megjithëse, sipas tij, është e vështirë të pranohet se shkëmbimi i territoreve do të pranohet nga Bashkimi Evropian (BE), pasi që nuk ishin opsione praktike gjatë gjithë shpërbërjes së ish-Jugosllavisë.

Po ashtu, sipas tij, ndarja e veriut nuk do të mbështetet nga asnjë serb që jeton në jug të lumit Ibër, pasi që kjo do t’i dobësonte drastikisht zgjedhësit serbë në Kosovë.

Miliçeviq më tutje në intervistë për “Zërin” është shprehur i bindur se asnjë njohje e pavarësisë së Kosovës nuk do të miratohet nga Beogradi.