Fundamenti

Mijëra familje gjilanase mbesin pa ujë të pijshëm, KEDS-i i ngadalshëm, nuk riparon defektet

/ 2 minuta lexim

Gjilan – Si pasojë e përkeqësimit të motit është shkaktuar defekt në lartë përçuesin e energjisë elektrike prej nga furnizohet me rrymë FPU Velekincë, ku nga dita e shtune ora 16:00 është ndërprerë furnizimi i konsumatorëve me ujë thuhet në njoftimin e kompanisë “Hidromorava”.

“Pas intervenimit nga ekipet e mirëmbajtjes të KEDS-it në rregullimin e lartë përçuesit është vërejtur se janë shkaktuar shumë defekte tjera në pajisjet automatike brenda impiantit për trajtimin e ujit. Ekipet tona teknike janë duke bërë përpjekje maksimale për evitimin e defekteve, mirëpo është e pamundur të rikthehet në punë Fabrika për Përpunimin e Ujit në Velekincë së paku deri ditën e hënë në mëngjes” thuhet në njoftimin e “Hidromoravës”.

Por në fakt uji ka munguar edhe të hënën në mëngjes për shkak të vonesës dhe papërgjegjësisë totale të KEDS-it dhe vet “Hidromoravës”.

Uji Dea

Banorët e lagjes së tetë e cila atakohet më së shumti nga kjo prishje e quajnë qesharake vonesën e KEDS-it dhe të “Hidromoravës”. “Jemi në muajin gusht kur mungesa e ujit na terrorizon tej mase dhe askush nuk merr përgjegjësi” thotë Ruhani banor në lagjen e tetë.

Isufi mërgimtar nga Gjermania tha se ka ardhur të shtunën në Gjilan ndërsa po ikë sot për shkak të mungesës së ujit.”Faleminderit për mikpritje dhe mirë kalofshi, unë po iki se nuk kisha ujë tash e tre ditë” u shpreh i revoltuar ky mërgimtar./rajonipress/