Meriton Salihu: Me Holandën e Ukrainën vështirë, por do t’ja dalim

Në Nyon të Zvicrës është bërë tërheqja e shortit për “Main Round” në kualifikimet e Botërorit 2024 në futsal. Kombëtarja e Kosovës do të garon në Grupin XI, ku do të ballafaqohet me Kombëtaren e Holandës e Ukrainës. Kombëtarja e Kosovës ishte në vazon e tretë, ku 36 Kombëtare u ndanë në 12 grupe me nga tri përfaqësuese.

Ndeshjet do të zhvillohen me sistem vajtje-ardhje, ndërsa fituesit e 12 grupeve dhe katër kombëtarëve të pozitës së dytë do të kualifikohen në “Elite Round”, ndërsa tetë kombëtaret tjera të pozitave të dyta do të luajnë në “Playoff”.

Njëri ndër futbollistët më të mirë në Kombëtaren e Kosovës, Meriton Salihu, i cili karrierën po e zhvillon në Zvicër, ka theksuar se do të jetë mjaft vështirë por nuk do të jenë pa gjasa. “Holanda e Ukraina janë dy kombëtare shumë të forta, unë së bashku me bashkëlojtarët e mi do të japim gjithçka nga vetja që të jemi në Kampionatin Botëror, kemi skuadër të mirë edhe përgatitjet të cilat do zhvillojmë para takimit me këto dy Kombëtare mendoj se do të komponohemi mjaft mire. Ne që nga fillimi së bashku me bashkëlojtarët e mi dhe me trajnerin tonë kemi vetëm një synim që të prekim Kampionatin Botëror dhe së bashku do t’ja dalim”.

Cikli i ndeshjeve do të fillon nga shtatori i këtij viti dhe përfundon në mars të vitit 2023. Kombëtarja e Kosovës u kualifikua na “Main Round”, pasi doli e dyta në fazën parakualifikuse./rajonipress/