Mehmeti: Mbajtja e dy posteve dëmton interesat e qytetarëve të Gjilanit

Gjilan – Arben Mehmeti shef i grupit të LDK-së thotë se ushtrimi i dy pozicioneve nga ana e Izmi Zekës , në të njëjtën kohë është profesionalisht i pamundur,dhe politikisht i dëmshëm.

Në një intervistë për rajonipress Izmi Zeka kryesues i Asamblesë Komunale dhe zëvendësministër i Punëve të Brendshme ka thënë se mbajtja e dy posteve nuk është e ndaluar me ligj. Por kështu nuk mendon Arben Mehmeti i cili e ka ndier vetën të “provokuar” nga kjo deklaratë.

Madje Mehmeti ka qenë më i zëshmi nga tabori opozitar që ka kërkuar disa herë nga Izmi Zeka që të japi dorëheqje nga pozita e kryesuesit për shkak të konfliktit të interesit.

Sipas Mehmetit mbajtja e dy pozitave nga ana e Zekës e cenon interesin institucional te kuvendit komunal dhe imazhin e tij si dhe dëmton direkt interesat e qytetarëve të komunës së Gjilanit sepse investimi i qeverise Thaçi për Gjilanin përfundon në dhënien dhe lejimin e pozicioneve të shumëfishta në të njëjtën kohë zyrtarëve më të lartë të PDK-së së Gjilanit si mjet politik preventiv për t`i mbajtur nën kontroll pavarësisht se nuk do të ketë investime në Gjilan nga Qeveria e Kosovës.

“Në Qeverinë aktuale të Kosovës çdo gjë është e mundur edhe mbajtja e dy pozicioneve sepse ky veprim është i vogël në krahasim me shumë zyrtar të PDK-së që kanë shumë ma tepër pozita në të njëjtën kohë. Ky është modeli i qeverisjes që ju bënë dëm të madh qytetarëve dhe vetëm ata janë që mund t`i parandalojnë këto veprime të dëmshme të këtyre zyrtarëve”mendon Mehmeti.

Madje Mehmeti e ka edhe një arsyetim tjetër pse Izmi Zeka i mbanë dy pozita. “Kjo dëshmon se kemi edhe luftë të brendshme në PDK për dominim dhe autoritet në masë si parakusht për të qenë kandidatura serioze në strukturat e tyre për pozicione udhëheqëse si dhe parapërgatitje për të hyrë në fronte në zgjedhjet e ardhshme lokale dhe parlamentare”.

Andaj shton Mehmeti, edhe nuk e ka lehtë Izmi Zeka të dorëzohet përball rivalit të tij Qemajl Mustafa për të qenë figurë e fuqishme brenda PDK-së pasi pretendimet e tyre janë të njëjta dhe se aktualisht mbajtja e dy pozicioneve është përparësi e Izmi Zekës në betejën që e pret me Qemajl Mustafën tha Mehmeti./rajonipress/