Medieve TVSH-ja u hiqet nga 1 korriku

Tatimi mbi Vlerën e Shtuar (TVSH) të gjitha mediave do tu hiqet nga data 1 korrik i këtij viti, kanë bërë të ditur zyrtarë të Ministrisë së Financave (MF).

Zëdhënësi i Ministrisë së Financave (MF), Menderes Ibra, ka thënë se ligji për Tatimin mbi Vlerën e Shtuar, tash më ka hyrë në fuqi, i cili parasheh edhe lirimin e mediave, shërbimeve spitalore dhe kujdesit mjekësor si dhe lirimin e universiteteve private nga TVSH-ja. “Ligji i ri për TVSH-në ka hyrë në fuqi ndërsa do të zbatohet nga data 1 korrik 2012”, tha Ibra për Telegrafin.

Ndërsa, zëvendësdrejtori i Administratës Tatimore të Kosovës (ATK), Sakip Ymeri ka sqaruar se ndryshimet e ligjit për TVSH-në hyjnë në fuqi 15 pas publikimit në gazetën zyrtare. “Fillimi i zbatimit do të bëhet nga data 1 korrik pasi TVSH-ja ndërlidhet ndërlidhët me periudhën tatimore. “Ligji është në fuqi prej datës 15 qershor, por efekti juridik lidhet me bazën tatimore. E baza tatimore krijohet në baza të plota tatimore ose në periudha tremujore qysh është tatimi në të ardhura apo në baza mujore që është TVSH-ja”, ka thënë Ymeri, për Koha Ditore.

Vlerësohet se heqja e TVSH-së për mediat do ta lehtësojë mbijetesën e mediave pas ndalimit të reklamimit të Qeverisë nëpër media për shkak të Ligjit të ri për Prokurimin Publik. /Telegrafi/

Shpërndaje.
© RAJONIPRESS