Më 1 shkurt nis beteja e Kosovës për PTK-në

Nga kuleta e shtetit vazhdojnë të dalin para për llogari të betejës për PTK-në, në të cilën Qeveria ka përballë kompaninë “ACP Axos Capital” GMBH. Ekskluzivisht për këtë çështje, ekzekutivi ka thirrur një mbledhje urgjente të premten, shkruan sot Koha Ditore.

Kabineti Qeveritar ka marrë dy vendime në lidhje me këtë e që kanë kosto financiare. Një vendim tjetër e kishte marrë në shtator. Atëkohë kishte ndarë 200 mijë euro.

Qeveria ka autorizuar Ministria e Zhvillimit Ekonomik (MZHE) për të bërë pagesën e shpenzimeve administrative në Qendrën Ndërkombëtare të Arbitrazhit mbi Investimet (ICSDI), përkitazi me këtë kontest.

Para një muaji, MZHE-ja kishte pranuar një urdhër të pagesës në kuadër të kësaj qendre ndërkombëtare, në formën e avancës. Pagesa është paraparë të bëhet nga të dyja palët në procedurë, në formën e shpenzimeve administrative, në mënyrë që të nisë procesi. Janë lejuar mjetet, por në Qeveri nuk është përmendur shuma e saktë.

Po të premten, Qeveria ka marrë edhe vendim për angazhimin e kompanisë ligjore “Patton Boggs” për ndërmarrjen e veprimeve procedurale përgatitore me karakter urgjent pranë të njëjtës qendër ndërkombëtare dhe për llogari të të njëjtit kontest që lidhet me procesin e privatizimit të PTK-së.

http://koha.net/?id=27&l=92639