McAllister: Dialogu Kosovë-Serbi do të jetë pjesë e konferencës së Berlinit

Raportuesi i Parlamentit Evropian për Serbinë, David McAllister pret që takimi i liderëve në Berlin, më 29 prill të kontribuojë në vazhdimin e dialogut në mes Kosovës dhe Serbisë, që sipas tij është një qëllim i përbashkët i Bashkimit Evropian.

“Dialogu mes Beogradit dhe Prishtinës do të jetë pjesë e konferencës në Berlin, por ajo nuk është për të zëvendësuar aktivitetet e Shërbimit të Jashtëm Evropian të Veprimit dhe Përfaqësuesve të Lartë. Qëllimi ynë i përbashkët është të vazhdojë dialogu”, tha McAllister, transmeton Indeksonline.

Ai shtoi se Përfaqësuesja e Lartë e BE-së, Federica Mogherini do të vazhdojë të ndërmjetësojë në dialogun mes dy vendeve dhe se takimi në Berlin do të jetë kontribut i vazhdimisht të bisedimeve.

“Ne të gjithë e dimë, jo vetëm në Bruksel, por edhe në Berlin e Paris që interesi ynë është Ballkani Perëndimor, që të vazhdojë integrimi evropian. Ne e dimë se sa i rëndësishëm është stabiliteti politik dhe ekonomik i rajonit, pra që stabiliteti të jetë i qëndrueshëm, për të sjellë dobi për gjithë kontinentin”, tha ai.

McAllister deklaroi gjithashtu se pengesa kryesore e mos-vazhdimisht të dialogut është taksa 100%.

“BE dhe ShBA-ja, por edhe partnerët e tjerë të Kosovës, kanë qenë gjithmonë të qartë në kërkesën që ky vendim të tërhiqet”, shtoi ai./Indeksonline/