Mbi 250 familje përfitojnë ndihma në prag të Fitër Bajramit, aksion humanitar i Bashkësisë Islame në Gjilan

Gjilan – Në prag të festës së Fitër Bajramit, Këshilli i Bashkësisë Islame në Gjilan, përmes degës së shoqatës humanitare “Bereqeti”, ka realizuar një aksion të gjerë bamirësie duke shpërndarë mbi 250 pako ushqimore për familjet në nevojë, veteranët e luftës, shoqatën e të verbërve dhe kategori të tjera të ndjeshme të shoqërisë.

Ky aktivitet humanitar vjen si dëshmi konkrete e solidaritetit dhe përkujdesjes institucionale ndaj atyre që kanë më së shumti nevojë, me synimin që gëzimi dhe begatia e festës së Bajramit të mos mungojnë në asnjë vatër familjare.

Nëpërmjet këtij angazhimi, u theksua edhe njëherë roli i rëndësishëm i institucioneve fetare dhe organizatave humanitare në kultivimin e vlerave të mëshirës, ndihmës së ndërsjellë dhe bashkimit shoqëror.

Nga Këshilli i Bashkësisë Islame në Gjilan u shpreh mirënjohje e veçantë për të gjithë kontribuuesit dhe mbështetësit e këtij aksioni, në veçanti për Sh.B. “Bashkëveprimi”, Arsi Cola, Floil, Interex, si dhe donatorët e shumtë nga Sofra e Ramazanit, të cilët mundësuan realizimin me sukses të kësaj nisme humanitare.

“Lusim Allahun e Madhëruar që çdo kontribut të shpërblehet me të mira dhe begati”, thuhet në njoftimin e KBI-së në Gjilan, duke theksuar se aktivitete të tilla do të vazhdojnë edhe në të ardhmen në shërbim të komunitetit./rajonipress/