Mbi 1800 gjoba brenda një jave në Gjilan, policia shton kontrollet në trafik

Gjilan – Drejtoria Rajonale e Policisë në Gjilan ka intensifikuar aktivitetet për sigurinë në trafik gjatë javës 03-09 prill 2026, duke rezultuar me gjithsej 1,849 gjoba të shqiptuara ndaj shkelësve të rregullave rrugore.

Sipas policisë, gjatë kësaj periudhe janë hetuar 15 aksidente trafiku me dëme materiale dhe 22 aksidente me të lënduar, ndërsa kontrollet në terren kanë evidentuar shkelje të shumta. Ndër to, janë shqiptuar 26 gjoba për mosvendosje të rripit të sigurisë, 8 për përdorim të telefonit gjatë vozitjes dhe 13 për modifikime të paligjshme të automjeteve, si vendosja e folieve të errëta.

Po ashtu, për 31 ngasës është shqiptuar masa e ndalimit të drejtimit të mjeteve motorike, si pjesë e masave ndëshkuese për shkelje të rënda në trafik.

Në kuadër të aktiviteteve të Task Forcës për rritjen e sigurisë rrugore, policia ka zhvilluar kontrolle të shtuara me fokus të veçantë tek motoçikletat, triçikletat dhe trotinetet, ku gjatë javës janë identifikuar dhe tërhequr 26 motoçikleta, duke u shqiptuar edhe gjobat përkatëse.

Policia rikujton se përdorimi i rripit të sigurisë është obligativ për të gjithë personat në automjet, ndërsa mosrespektimi i këtij rregulli ndëshkohet me gjobë prej 150 euro, duke apeluar për kujdes dhe respektim të rregullave në komunikacion./rajonipress/