Mbahet takimi me qytetarë për Projekt-Buxhetin për vitin 2024 në fshatrat Shipashnicë e Poshtme dhe Shipashnicë e Epërme
Kamenicë – Kërkesat që banorët e këtyre fshatrave paraqiten kishin të bëjnë me: asfaltim të rrugëve, trotuar, vend për mbeturinat e ngurta, kanalizim, tabela, rregullimi i kanaleve atmosferike, riemërtim i rrugëve, rregullim i varrezave, rregullim i shtratit të lumit.
Drejtoria për Buxhet dhe Financa në bashkëpunim me Kuvendin Komunal kanë mbajtur dëgjimin me qytetarë për Projekt-Buxhetin për vitin 2024 në fshatrat Shipashnicë e Poshtme dhe Shipashnicë e Epërme.
Pjesëmarrës në këto dëgjime ishin: Kryetari i Komunës, Kadri Rahimaj, Drejtoresha e Drejtorisë për Buxhet dhe Financa, Ardita Dërmaku, Zyrtari Kryesor Financiar, Naser Hashani, zyrtarë të tjerë komunal përgjegjës për mbajtjen e dëgjimeve buxhetore.
Drejtoresha Ardita Dërmaku ka prezantuar buxhetin për vitin 2024. Ajo ka kërkuar nga banorët e këtyre fshatrave që të paraqesin projektet e tyre, pasi që ata i dinë më së miri se çka kanë nevojë për lokalitetet e tyre.
“Arsyeja kryesore e këtij takimi është që përmes juve t’i marrim projektet prioritare që mendoni se janë të rëndësishme për vendet tuaja, pasi që ju jeni ata që i dini më së miri këto prioritete. Vitin e kaluar ishim këtu ku i morëm prioritetet tuaja dhe pas përfundimit të dëgjimeve buxhetore përpiluam një raport ku në atë raport i paraqitëm kërkesat dhe ato më prioritare i vendosëm në projekt. Njëjtë do të vendosim edhe këtë vit për planifikimin e buxhetit për vitin 2024. Ne krahasuar me vitin 2023 kemi rritje prej 17,48% për vitin 2024. Do të kemi rritje edhe në investime kapitale në 2.3 milion, si dhe në subvencione 650 mijë euro”, ka thënë ajo.
Kryetari Kadri Rahimaj duke falënderuar banorët e këtyre fshatrave, theksoi se ky është rasti më i mirë i pjesëmarrjes në vendimmarrje dhe të kthehet besimi i qytetarëve në institucione.
“Kemi nevojë t’i identifikojmë problemet dhe për këtë kemi dalë sot këtu t’i marrim sfidat dhe nevojat në fshatrat tuaja. Në procesin e vendimmarrjes jemi bashkë, dhe kjo është një prej formave ku ne duam ta kthejmë besimin në institucione”, ka thënë ai.
Kërkesat që banorët e këtyre fshatrave paraqiten kishin të bëjnë me: asfaltim të rrugëve, trotuar, vend për mbeturinat e ngurta, kanalizim, tabela, rregullimi i kanaleve atmosferike, riemërtim i rrugëve, rregullim i varrezave, rregullim i shtratit të lumit.
Të gjitha kërkesat e tyre u evidentuan dhe ato më me prioritet do të inkorporohen në projekt buxhet./rajonipress/