Mbahet manifestimi poetik e letrar “Kultura na bashkon 2021”

Në ambientin e Bibliotekës së qytetit “Mehmet Jusufi” në Preshevë, u mbajt Manifestimi i përvitshëm poetik letrar “Kultura na bashkon 2021” në theks të veçantë Tribuna letrare me titull “10 vjet me Feniksin Shoqatë”.

Manifestimin e shpalli të hapur kryetari i Shoqatës së Shkrimtarëve “Feniks” (Preshevë, Bujanoc dhe Medvegjë) Bilall Maliqi, i cili u dëshiroi mirëseardhje poetëve të pranishëm, përderisa drejtori i bibliotekës z. Reshat Neziri foli për bashkëpunimin e institucionit që ai e drejton me Shoqatën “Feniks” ku drejtoi lavderata për shoqatës për bashkëpunim korrekt.

Për 10 vjetorin e Shoqatës foli Bilall Maliqi, atëbotë, kryetar i grupit themeltar të Shoqatës, për nevojën e themelimit dhe për sukseset e njëpasnjëshme të Shoqatës sonë.

Për këtë temë folën edhe anëtarët tjerë themelues Arsim Halili dhe Nehat Ramizi, të cilët evokuan kujtime për këtë jubile, ndërsa Arsim Halili i përshëndeti të pranishmit në emrin e ARS “Beqir Musliu” në Gjilan, në emrin e kryetarit të saj Sabit Rrustemi.

Ndërsa për anëtarin tjetër të grupit themeltar Demush Berisha tanimë të ndjerë u shprehën konsiderata dhe falënderime.

U ndan mirënjohje për themeltarët e Shoqatës. Po ashtu u ndan mirënjohje edhe për Prof. dr. Shefki Selami-Poeti për bashkëpunim si dhe për poetin Fatos Rushiti për të arriturat në letërsi.

Po në këtë Manifestim u shpall Dr. Flora Brovina anëtare nderi e Shoqatës së Shkrimtarëve “Feniks” (Luginë e Preshevës). Në mungesë të saj letrën falënderuese e lexoi kryetari i Shoqatës, Bilall Maliqi.

Pjesë përbërëse e aktivitetit ishte Ora e Madhe Letrare “Ora e bashkimit” në të cilin lexuan poetë nga konkursi letrar dhe të pranishmit.

Juria e përbërë: Sevdail Hyseni (kryetar), Mustafa Ismaili (anëtar) dhe Rrahman Hyseni (anëtar), i vlerësuan me çmimin e parë poetin Shefqet Dibrani me poezinë COVID 19 dhe poeten Majlinda Shaqiri me poezinë” Gjerdan nusërie”.

Në orën letrare lexuan poetët e pranishëm poezitë e tyre: Bilall Maliqi, Shefqet Dibrani, Majlinda Shaqiri, Avni Shaqiri, Rexhep Abazi, Jalldëze Kasumi, Havushe Kasumi Ahmeti, Nijazi Kastrati, Valbona Hasani, Emine Murseli, Marigona Fejzullahu- Salihu, Elton Mehmeti, Selajdin Salijesor, Tomorr Kelmendi, Halim Hasani, Arsim Halili, Mustafa Ismaili, Xhahit Ramadani, Nehat Ramizi, Rrahman Hyseni, Azra Alia dhe Emine Islami…

Vlen të theksohet se ky projekt u mbështet nga komuna e Preshevë në konkursin për OJQ…/rajonipress/