Mbahen dëgjime publike për krijimin e Shoqatave të Pronarëve në Kamenicë

Kamenicë – Komisioni Komunal për inicimin dhe mbështetjen e Pronarëve të Ndërtesave në Bashkëpronësi për krijimin e Shoqatave të Pronarëve, gjatë datave 14, 15 dhe 16 prill 2026, ka mbajtur dëgjime publike me qytetarët e Komunës së Kamenicës.

Në këto takime kanë marrë pjesë pronarë dhe shfrytëzues të njësive individuale të banimit në ndërtesa në bashkëpronësi, të cilët janë informuar lidhur me rëndësinë e organizimit dhe bashkëpunimit përmes krijimit të Shoqatave të Pronarëve.

Gjatë dëgjimeve, përfaqësuesit e Komisionit kanë prezantuar qëllimin dhe funksionin e këtyre shoqatave, duke theksuar se ato do të shërbejnë si mekanizëm për përfaqësimin, mbrojtjen dhe avancimin e të drejtave dhe interesave të banorëve në ndërtesat në bashkëpronësi.

Komuna e Kamenicës mbetet e përkushtuar në mbështetjen e iniciativave që synojnë përmirësimin e jetesës dhe organizimit të komunitetit në ndërtesat kolektive./rajonipress/