Maxhuni: Sulmi mbi Kuvendin me elemente terroriste

Kreu i Policisë ka folur edhe për rastin e sulmit ndaj Kuvendit pasi u pyet nga anëtarët e Komisionit. Maxhuni për këtë rast theksoi se sulmi mbi Kuvendin e vlerësojnë serioz dhe e kanë vlerësuar akt me elemente terroriste. Ai tha se do të bëjnë gjithçka që këtë rast ta zgjidhin dhe autorin e tyre ta sjellin para drejtësisë. Maxhuni tha se kanë ofruar edhe shpërblim që kushdo që ka informacione që mund ti ndihmoj t’ia japin PK-së. Kreu i PK-së tha se të gjitha drejtoritë janë të kyçura 24 orë në zbardhjen e këtij rasti. Ai tha se në vendngjarje kanë gjetur elemente që ndihmojnë zbardhjen e rastit.

Maxhuni ka folur edhe për ngjarjen e ‘Beer Fest’ ku ka thënë se aty ka shtënë me arme me gaz një i panjohur për PK-në. Ai ka thënë se ngjarje të tilla duhet të bëhen në bashkëpunim dhe koordinim me të mirë mes gjithë akterëve.

Kryetari i Komisionit Daut Haradinaj ka thënë se ata që duan ti japin ngjyra politike sulmit në Kuvend, nuk shohin përtej hundës së tyre.

Deputeti Anton Quni duke pyetur drejtorin e Policisë së Kosovës ka thënë se nëse është e vërtetë se Kuvendi është gjuajtur me Anti-Tank apo siç njihet si Zollë, që është shumë herë armë më e rënd se sa që i ka PK-ja dhe institucionet e sigurisë, atëherë i bie se ka formacione paraushtarake që funksionojnë në Kosovë.

Quni ka lavdëruar PK-në për rezultatet që i përmendi Maxhuni por tha se do të ishte më i lumtur sikur ai të vinte me raport se kanë arrestuar autorin e sulmit ndaj Kuvendit. /ZËRI