Mavraj: Ndeshja në Beograd na motivoi, askush s’mund të na mposhtë

Mërgim Mavraj ndihet më i motivuar se kurrë, pas ndeshjes së ndërprerë ndërmjet Serbisë dhe Shqipërisë, të cilën më pas UEFA e regjistroi me rezultat zyrtar, 3:0 për serbët.

Futbollisti kosovar insiston se nga kjo situatë përfitoi më së shumti ekipi Kuqezi, duke theksuar se tash djelmoshat e Gianni De Biasit janë më të motivuar dhe se tash e tutje askush s’mund t’i ndalë.

“U grumbulluam prapë me Kombëtaren. Kësaj radhe me një dëshirë si kurrë më parë, me një ëndërr që edhe më shumë u fut në zemrat tona. Kjo ndjenjë nuk shihet vetëm ke skuadra jonë, por tek të gjithë shqiptarët anembanë botës”, ka shkruar mbrojtësi i Kolnit në profilin e tij në rrjetin social, Facebook.

“Jemi të lidhur nga ajo ditë që asgjë dhe askush nuk mund të na mposht. Edhe pse e humbëm ndeshjen në tavolinë, ne si komb fituam shumë. Shpresoj që me ndihmën e Allahut, ta pranojmë këtë vendim si sprovë dhe ta kalojmë me sukses dhe do të shpërblehemi me diçka edhe më të mirë”, përfundoi qendërmbrojtësi kosovar.