Matoshi: Vijat e kuqe të AKR-së, vlejnë për PDK-në

Kamenicë – Kryetari i Degës së AKR-së në Kamenicë Fatmir Matoshi, i cili në këtë fazë është njëri nga bashkëpunëtorët e ngushtë të liderit të kësaj partie, i pyetur për mundësitë e bashkëpunimit të AKR-së me partitë e tjera politike ka thënë se aktualisht AKR-ja ka vija të kuqe për PDK-në.

“AKR-ja në mandatin e kaluar qeverisës është munduar të jap kontributin e saj brenda institucioneve të Kosovës, por në vend se të përkrahej ajo është penguar nga PDK-ja. Rrethanat politike dhe ngjarjet e fundit e sidomos afera e përgjimeve të cilën e dëgjuam të gjithë e bën të pamundur një bashkëpunim me PDK-në në të ardhmen. Ky është qëndrim i elektoratit dhe strukturave që po themelohen të AKR-së, por i bën mirë edhe gjithë Kosovës. Kjo parti duhet të kalojë në opozitë sepse nga fillimi i vitit 2008 ka qenë përgjegjëse e drejtpërdrejt për zhvillimin e vendit, dhe ka dështuar në këtë aspekt.” ka thënë Matoshi, raporton rajonipress.

Përsa i përket partisë së dytë në vend LDK-së, zyrtari i AKR-së ka thënë se LDK është subjekt i respektueshëm, por që aktualisht, problem i saj qëndron në lidershipin e partisë. “LDK e drejtuar nga Isa Mustafa nuk ka asgjë të përbashkët me LDK-në e Ibrahim Rugovës, përveç thirrjeve në emër të tij e që nuk janë dinjitoze dhe të ndershme për qytetarët e Kosovës.”

Matoshi beson se nuk do të jetë e largët koha kur VV do të ndahet në dy parti politike sepse funksionimi i saj në këtë mënyrë do të bëhet i padurueshëm për njërin nga dy krahët e saj./rajonipress/