Maloku:Të ndryshohet Ligji për FSK-në

Njohësi i çështjeve ushtarake, Naim Maloku, pas vlerësimit të NATO-s, se FSK-ja i ka përmbushur kapacitetet operacionale, ka kërkuar nga institucionet shtetërore ta fillojnë ndryshimin dhe plotësimin e Ligjit për FSK-në.

“Ligji për FSK-në është miratuar në vitin 2008. Ai kufizim ligjor ka kaluar. Tani mendoj se duhet të bëhen plotësime dhe ndryshime në Ligjin për FSK-në në mënyrë që kësaj force t’i vazhdohet mandati konform zhvillimeve që janë brenda në Kosovë dhe jashtë saj”, ka thënë për “Epokën e re” Maloku.

Ai ka bërë me dije se vlerësimi i NATO-s për FSK-në nuk po interpretohet drejt në opinion. “FSK-ja ka ngritur kapacitetet e saj operacionale për mandatin që ka. Kështu duhet të lexohet ky vendim”, ka thënë Maloku.

Maloku ka vlerësuar se shndërrimi i FSK-së në ushtri të Kosovës varet nga vullneti i NATO-s. “E ardhmja e FSK-së varet drejtpërdrejt nga NATO-ja, sepse synimi i Kosovës është anëtarësimi në këtë organizatë. E normalisht se NATO-ja do t’ia përcaktojë Kosovës numrin e ushtarëve, kapacitetet që duhet t’i ketë, përfshirë edhe pajisjet dhe kalibrat e armëve që do t’i ketë ushtria e ardhshme e Kosovës”, ka thënë Maloku. Sipas Malokut, brenda dhjetë vjetëve Kosova do të ketë një ushtri sipas standardeve të NATO-s. /Indeksonline/