Maloku: Asnjë serb i dyshuar për krime lufte nuk do të amnistohet

Gjilan – Jetish Maloku kryeprokuror në Prokurorin Themelore në Gjilan tha për rajonipress se familjet e të vrarëve gjatë luftës, por edhe fshatrat Llashticë, Llovcë, Zhegoc e Zhegër që kanë deponuar kallëzime penale nuk kanë nevojë të shqetësohen sepse të gjitha rastet do të hetohen. Askush nuk do të amnistohet dhe nuk do të mund t`i ikë përgjegjësisë penale tha Maloku.

Kryeprokurori Jetish Maloku pasi ka lexuar për kërkesat e fshatrave që të hetohen serbët e dyshuar, aty ku krimet serbe janë më të rënda dhe ku ka fakte e dëshmi i ka siguruar të gjithë familjarët se institucioni që ai drejton nuk do të hesht për asnjë moment ndaj asnjë serbi që është i dyshuar dhe që ndodhen në kallëzimet penale.

“I sigurojë familjet e të vrarëve gjatë luftës, por edhe fshatrat Llashticë, Llovcë, Zhegoc e Zhegër që kanë deponuar kallëzime penale se nuk kanë nevojë të shqetësohen sepse të gjitha rastet do të hetohen. Askush nuk do të amnistohet dhe nuk do të mund t`i ikë përgjegjësisë penale asnjë serb i dyshuar për krimet e luftës” tha Maloku.

Maloku tha se dikur ishte UNMIK-u ai që stoponte vendorët që të merren me krimet e luftës. Më vonë edhe EULEX-i mori disa kompetenca, por tani me reformimin gjyqësor edhe vendorët kanë kompetenca që të hetojnë krimet e rënda.”Asnjë serb i Anamoravës që ndodhet në listat e të dyshuarve ose në kallëzimet penale të fshatrave ku kanë ndodhur masakrat nuk do të amnistohen. Krimi mund të vjetrohet, por kurrë nuk harrohet. Ne kemi përgjegjësi profesionale që rastet t`i hetojmë dhe në momentin e parë ne do t`i procedojmë një nga një” tha Maloku.

Maloku është i befasuar që nga ish prokuroria e Qarkut nuk ka gjetur në dosje asnjë lëndë të krimeve të luftës.”Unë jam në kërkim e sipër të të gjitha materialeve të deponuara nga qytetarët dhe fshatrat shqiptare. Krimet e rënda siç është Zhegra, Llashtica, Zhegoci, Lladova do të hetohen sepse aty ka dëshmi, prova, foto , procesverbale nga vendi krimit që janë kryer nga vet serbët “.

Ndryshe përfaqësues të familjarëve të dëshmorëve, përfaqësues të fshatrave shqiptare ku kanë ndodhur vrasjet e civilëve të pafajshëm gjatë kohës së luftës janë shprehur të befasuar që asnjë serb i dyshuar që ndodhet në kallëzimet penale të deponuara në organet hetuese nuk është arrestuar apo intervistuar./rajonipress/