Maloku: AKI-ja nuk ka të drejtë t’i verifikojë deputetët

Prishtinë – Ish-kryetari i Komisionit për siguri në Kuvendin e Kosovës, Naim Maloku i ka dhënë të drejtë kryeparlamentarit Jakup Krasniqi, duke thënë se Agjencia Kosovare e Inteligjencës (AKI) nuk ka të drejtë ta bëjë verifikimin e deputetëve të Kuvendit.

“Asnjë shërbim sekret në botën demokratike, në këtë rast as AKI-ja, nuk ka të drejtë dhe mandat t’i verifikojë deputetët, të cilët janë të zgjedhur me votën e qytetarëve. Për të qenë më i qartë, AKI-ja nuk ka të drejtë ta verifikojë as edhe kryetarin e një fshati i cili është i zgjedhur me votën e qytetarëve të atij fshati”, është shprehur Maloku në një intervistë për gazetën Epoka e re.