Mall që nuk shuhet: Kujtimi i përjetshëm për dëshmorin Fatmir Leci

Prishtinë – Në çdo përvjetor, dhimbja rikthehet po aq e freskët sa ditën e parë, ndërsa kujtimi bëhet edhe më i thellë. Vajza e tij, Lirije Leci, e përkujton me fjalë që rrjedhin nga zemra, duke dëshmuar se koha nuk e shuan as mallin, as plagën e humbjes.

Ka jetë që nuk maten me vitet që jetuan, por me peshën e sakrificës që lanë pas. Fatmir Leci ishte njëri prej tyre – njeri punëtor, i urtë e i dashur, shtyllë e familjes dhe shembull i përkushtimit njerëzor.

Në pragun e shtëpisë së tij, aty ku duhej të mbretëronte siguria dhe jeta, ai u përball me dhunën e verbër të forcave serbe, duke u bërë kurban për lirinë e Kosovës. Rënia e tij nuk ishte vetëm humbje për familjen, por plagë për gjithë një popull që pa tek ai fytyrën e sakrificës dhe të qëndresës.

Në atë moment tragjik, ai u shndërrua nga kryefamiljar i përkushtuar në simbol të përjetshëm të lirisë që sot gëzojmë.

Në 27-vjetorin e rënies, vajza Lirie Leci i drejtohet babait të saj, dëshmorit Fatmir Leci, me ndjenja që ndërthuren mes dhimbjes dhe krenarisë: një baba që nuk u kthye më, por që mbeti përgjithmonë në themel të lirisë së atdheut.

“Sakrifikove gjithçka për ne, për të ardhmen tonë, për vendin që e deshe pa kufi”, janë fjalë që peshojnë rëndë, sepse pas tyre qëndron një histori jete e ndërprerë dhunshëm dhe një familje që mësoi të jetojë me mungesën. Edhe pse vitet kalojnë, boshllëku që la pas nuk mbushet kurrë, ai vetëm mësohet të bartet me dinjitet.

Ky përkujtim nuk është vetëm një akt familjar, por një thirrje kujtese për sakrificën e atyre që dhanë jetën për liri. Sepse dëshmorët nuk jetojnë vetëm në histori, ata jetojnë në kujtimet, në dhimbjen dhe në krenarinë e atyre që i deshën dhe që vazhdojnë t’i kujtojnë çdo ditë./rajonipress/