Malajzia “liron” sportistët e saj nga agjërimi

Londër – Zyrtarët e Komitetit Olimpik të Malajzisë, kanë bërë të ditur se sportistët e këtij vendi me shumicë të popullsisë islame, janë liruar të mos agjërojnë muajin e madhërishëm të Ramazanit, derisa do të garojnë në Lojërat Olimpike “Londra 2012”.

Olimpiada “Londra 2012” që hapet të premten mbrëma, për herë të parë do të mbahet gjatë muajit të Ramazanit pas Lojërave Olimpike “Moska 1980”.

Gjatë muajit të Ramazanit, që nisi javën e shkuar, myslimanët obligohen të agjërojnë nga lindja e diellit deri në perëndim. Mirëpo, një zyrtar i Komitetit Olimpik të Malajzisë ka bërë të ditur se autoritetit fetare, kanë dhënë lejen që sportistët e këtij vendi mund të agjërojnë Ramazanin pas përfundimit të Olimpiadës “Londra 2012”. Sipas tyre, ata nuk do të agjërojnë gjatë kohës së Olimpiadës, pasi po garojnë për nderin e shtetit të tyre në një ngjarje të rëndësishme ndërkombëtare sportive.

“Atletët tanë po shkojnë në Olimpiadë për t’i sjellë famë shtetit tonë. Ata mund të agjërojnë pasi të përfundojë Olimpiada dhe kur të kthehen në Malajzi”, tha Mufti Harussani Zakaria, njëri prej zyrtarëve kryesorë të fesë islame në këtë vend. “Kurani i madhërishëm thotë se nëse ke një mision për ta kompletuar, atëherë mund ta shtysh agjërimin. Mirëpo, duhet t’i zëvendësosh ditët që nuk i ke agjëruar” (më gjerësisht sot në “Koha Ditore”).