Makolli interesohet për diasporën shqiptare në Turqi

Në vazhdën e bashkëpunimit ndërshtetëror në mes Republikës së Kosovës dhe Turqisë, Ministri i Diasporës, Ibrahim Makolli, priti në një takim ambasadoren e Turqisë, Songul Ozan.

Sipas një njoftimi të ministrisë, në takim u bisedua për thellimin e bashkëpunimit kulturor në mes dy shteteve, duke pas parasysh numrin e madh të pjesëtarëve të diasporës kosovare në Turqi dhe komunitetin turk që jeton në Republikën e Kosovës.

“Ministri Makolli e njoftoi ambasadoren Ozan me punën që deri më tash është bërë në hapjen e Qendrës Kulturore të Kosovës në Stamboll. Ai falënderoi ambasadoren e Turqisë për mbështetje të vazhdueshme”, thuhet në njoftim.

Sipas njoftimit, të dy bashkëbiseduesit theksuan nevojën e thellimit të mëtutjeshëm të bashkëpunimit ndërshtetëror që do të afronte edhe më shumë popujt e të dyja vendeve.