Majlinda refuzon të heqë dorë nga Kosova

Londër, 31 maj – Shpresa më e madhe e Kosovës për medalje në lojërat olimpike “Londra 2012”, ish-kampionia botërore e junioreve, Majlinda Kelmendi, do të bëjë tentimin e fundit për t’iu lejuar paraqitja në Olimpiadë si sportiste e pavarur.

Kelmendi dëshiron të garojë nën flamurin e Komitetit Olimpik Ndërkombëtar (IOC), shumë më tepër sesa të detyrohet të prezantojë Shqipërinë.

Komiteti Ekzekutiv i IOC-së, gjatë javës së shkuar me mbledhjen e mbajtur në Quebec të Kanadasë refuzoi kërkesën e Kelmendit për të garuar si e pavarur në Olimpiadë, me gjithë letrën personale që i kishte shkruar presidentit Jacques Rogge, si dëshmi nga dora e parë për rastin specifik të saj. Tash Kelmendi sërish ka ndërmend t’i shkruajë një letër kreut të IOC-së, Rogge që edhe njëherë ta shqyrtojë kërkesën e saj dhe t’i mundësojë përfaqësimin në Olimpiadë nën flamurin olimpik.

Kelmendi nuk është në gjendje të përfaqësojë shtetin e Kosovës në LO “Londra 2012” pasi Komiteti Olimpik i Kosovës nuk është anëtar i Komitetit Olimpik Ndërkombëtar (IOC), ndonëse Federata e Xhudos e Kosovës është anëtare me të drejta të plota në Federatën Ndërkombëtare të Xhudos.(koha)

Shpërndaje.
© RAJONIPRESS