Prishtinë – Është kthyer në Kosovë, olimpistja e vetme që morri pjesë në “Londra 2012”, Majlinda Kelmendi.
Ajo arriti fitoren e parë olimpike në karrierën e saj, duke mposhtur në rrethin e parë finlandezen Jaana Sundberg, ndërsa në të tetën e finales u mposht nga Legentill, xhudsitja nga Mauriciusi.
Kelmendi vlerëson se pritjet e mëdha për medalje, në Kosovë dhe Shqipëri, dhe pjesëmarrja për herë të parë në Olimpiadë, e bënë të veten, dhe si rezultat i këtij presioni u mposht nga një garuese si Legentill, që nuk është as në mesin e 100 më të mirave në botë.
Nga ana tjetër trajneri i saj, Driton Kuka, ka thënë se të gjithë sportistët e mëdhenj bëjnë gabime ndonjë herë. Ai për ilustrim bëri një krahasim ndërmjet futbollistit Lionel Messit dhe Majlindës, duke thënë se edhe Messi sivjet në Ligën e Kampionëve e huqi penalltinë dhe Barcelona u eliminua.
Ministri për Kulturë Rini dhe Sport, Memli Krasniqi tha se ky është suksesi më i madh i sportit kosovar në këto dy dekadat e fundit.
