Mahmuti: Hapësira urbanistike po ruhet – ka tejkalime të ndërtimeve të larta

Gjilan – Bahrije Mahmuti drejtoreshë e urbanizmit në një takim me gazetarët ka shpalosur punën dhe aktivitetin e kësaj drejtorie. Sipas saj gjatë vitit 2012 janë lëshuar 110 leje ndërtimore. Hapësira urbanistike sipas saj po ruhet kurse tek ndërtimet e larta ka tejkalime.

Gjatë vitit 2012 janë ndërtuar mbi 62 mijë metra katror në Gjilan derisa janë lëshuar 150 leje urbanistike prej tyre 110 leje ndërtimore. Kështu tha Bahrije Mahmuti drejtoreshë e Urbanizmit.

Mahmuti tha se drejtoria e saj ka qenë mjaft aktive dhe ka luajtur një rol emancipues tek qytetarët për ta ruajtur hapësirën urbanistike. “Hapësira urbanistike po ruhet falë vetëdijesimit të qytetarëve, por edhe punës sonë profesionale që e bëjmë çdo ditë. Gjithashtu edhe pse kemi qenë mjaft azhur në parandalimin e ndërtimeve të larta, ka aty këtu ndonjë tejkalim të vogël” tha Mahmuti.

Mahmuti tha se si projekte që e vlen të përmendet nga kjo drejtori janë planet rregulluese në zonën urbane ku rreth 200 hektar janë kryer dhe mbi 460 hektar me pesë zona janë në proces e sipër.

Gjithashtu sipas Mahmutit edhe zona rurale duke përfshirë Zhegrën janë në proces. Në qershor të këtij viti Gjilani pritet të ketë një qendër urban- tektonike ku parashihet edhe ndërtimi i administratës komunale tek Gjykata e tanishme Gjilanit dhe Hoteli “Kristal” që parashihet si karakter publik./rajonipress/