Madonna paditet nga politikania radikale Le Pen

Paris – Liderja e Frontit Kombëtar në Francë, Marine Le Pen deklaron se do të hedhë në gjyq mbretëreshën e popit, Madonna, pas koncertit të zhvilluar të shtunën në Paris, ku këngëtarja shfaqi një video që përmbante pamje të Le Pen me kryqin e thyer në ballë.

Videoja ishte paraqitur edhe në koncertet e tjera në kuadër të turneut të Madonnas, dhe Fronti Kombëtar pati paralajmëruar se do të padiste këngëtaren nëse videoja do të shfaqej edhe në Francë.

Por, pavarësisht paralajmërimeve, Madonna e shfaqi videon pikërisht në koncertin e zhvilluar këtë të shtunë kur Franca shënoi festën kombëtare.

“Nuk mund të pranojmë një krahasim kaq të urryer”, ka deklaruar zv/kryetari i Frontit Kombëtar, duke shtuar se padia do të paraqitet këtë javë.

Videoja në fjalë, që shërben si sfond për interpretimin e këngës “Nobody Knows Me”, shfaq një fotografi të Le Pen me kryqin e thyer të vendosur mbi ballë dhe menjëherë më pas shfaqet një imazh i liderit nazist Adolf Hitler.

Marine Le Pen, e cila e mori kontrollin e partisë nga babai i saj, Jean Mari Le Pen, është përpjekur ta zhveshë imazhin e Frontit Kombëtar si raciste dhe anti-semite, e veçanërisht gjatë kandidaturës së saj për presidente të Francës.