LVV: Salih Salihu do të fitoj në Viti

Viti – Lëvizja VETЁVENDOSJE!, Qendra në Viti, Shtabi Zgjedhor, kandidatët për Asamble të Komunës dhe të gjithë aktivistët e saj në Viti, sigurojnë qytetarët e Vitisë, se Lëvizja VETЁVENDOSJE! në Viti është unike, e organizuar dhe e fuqishme në marshin e saj drejt fitores së kandidatit të saj, profesor Salih Salihut.

Nuk ka forcë, që mund të ndal vullnetin e qytetarëve të Vitisë për ndryshime. Përpjekjet e Sokol Halitit, të ndihmuar edhe nga individ e grupe brenda PDK-së dhe të tjerë, me të cilat faktikisht ka qenë në bashkëqeverisje për katër vitet e fundit, që me shpifje e fabrikime nga më të ulëtat, duke mos kursyer edhe ato personale e familjare, me përpjekje për shantazh e presione mediale të dëmtojnë personalitetin e profesor Salihut, nuk do të kenë sukses.

Nuk do të ketë sukses as presioni ndaj kandidatëve për asamble dhe aktivistëve të Lëvizjes e as tentimi për të blerë apo kërcënuar qytetarët në shkëmbim të votës. Vitia e njeh mirë profesor Salihun dhe Lëvizjen VETËVENDOSJE!, prandaj e ka mbështetur dhe do ta mbështes edhe më fuqishëm.

Zgjedhjet e 11 Qershorit dëshmuan se Lëvizja VETËVENDOSJE! në Viti është subjekti i parë politik dhe Salih Salihu është përfaqsuesi i saj më legjitim që do të udhëheqë Vitinë. Kjo mbështetje qytetare, e cila po zgjerohet për çdo ditë e më shumë, na ka shtuar ndjenjën e përgjegjësisë që të përgatitemi për qeverisjen e re të pas 22 tetorit me Salih Salihun në krye.

Për këtë qëllim, Salih Salihu, kandidatët për Asamble dhe Lëvizja VETËVENDOSJE! në tërësi janë përkushtuar që të forcojnë kontratën me qytetarët e Vitisë, për të ndërtuar qeverisjen e re, të përgjegjshme, efikase dhe llogaridhënëse, që do shënoj fundit e mendësisë së deritanishme primitive, të bazuar në interesa individuale e klanore.

Me këtë rast, i sigurojmë qyetarët e Vitisë, që çdo shpifje e fabrikim do të demaskohet e denoncohet në organet përgjegjëse të shtetit.

Lëvizja VETËVENDOSJE! dhe Salih Salihu po vijnë.
Vitia po çlirohet nga mendësia e vjetër dhe keqqeverisja e keqmenaxhimi.
Me mendje e zemër për Vitinë
Lëvizja VETËVENDOSJE!, Qendra në Viti.