Lutfi Haziri: Dilni e votoni qetë për Republikën tonë

Gjilan – Kryetari i Degës së Lidhjes Demokratike të Kosovës në Gjilan, njëherit nënkryetar në nivel qendror, Lutfi Haziri, ka votuar para pak çastesh në shkollën fillore “Abaz Ajeti”, në Gjilan, ku ka apeluar për zgjedhje të mira e të qeta.

“Sot po fillojmë një përkushtim tonin për shtetin, në ditën e 16 të Ramazanit, që përveç përkushtimit ndaj familjes dhe Zotit, sot demonstrojmë përkushtimin ndaj Republikës sonë. Për Republikën të cilën e themeluan baballarët tanë, dëshmorët e heronjtë tanë.

Për Republikën, të cilën po e mbajnë njerëzit e mirë të Gjilanit, Anamoravës dhe Kosovës. Për Republikën, që po e mban Mërgimtari dhe bashkëpatriotët tanë kudo në botë. Ju lus për zgjedhje të mira e të qeta dhe që të votoni me dorën e djathtë.

Jam krenar që sot voton për herë të parë edhe brezi i tretë i familjes sime, dy vajzat e mia, Kënga dhe Lotina. Natyrisht, brezi i parë është babai im dhe heroi ynë, i cili sot më mungon jashtëzakonisht shumë.

Në emër të Republikës sonë e Zotit, të dalim faqebardhë. Dil e voto edhe ti. Mos ma harro Republikën edhe kur përfaqësuesja jonë luan në gara ndërkombëtare. Uroj fitore në Shkodër e Prishtinë”, thuhet në apelin e kryetarit Haziri./rajonipress/