Lutfi Haziri beson se vendkalimi kufitar Stanqiq-Bellanoc do të hapet në shtator

Gjilan – Kryetari i Komunës së Gjilanit, Lutfi Haziri, ka qëndruar në Kumanovë dhe ka zhvilluar takim pune me kryetarin, Zoran Damjanovski, me të cilin ka biseduar për hapjen e pikës kufitare Bellanoc-Stanqiq.

“Tashmë jemi në prag të hapjes së kufirit Bellanovc-Stanqiq, i cili lejon mundësinë e qarkullimit të njerëzve dhe mallrave deri në 3.5 tonë. Janë kryer procedurat dhe besoj që qeveria e kryeministrit Zajev dhe qeveria në detyrë e Kosovës ka mundësi që ta përgatis sa më shpejtë sepse edhe projekti i Bellanocit është financuar prej Komisionit Europian”, ka thënë Haziri.

Haziri ka shfaqur shpresën se shumë shpejtë edhe bujqit e fermerët Kumanovës do t’i shesin prodhimet ne Gjilan dhe anasjelltas, duke shtuar se finalizimi i këtij projekti është në interes të dy palëve.

“Unë besoj shumë që në shtator do të zyrtarizohet hapja e këtij vendkalimi sepse kanë mbetur që të vendoset vetëm policia dhe dogana. Unë do të bisedoj me kryetarin e Komunës së Kumanovës që ta gjejmë një mënyrë që të mos i pengojmë qytetarët të qarkullojnë tash, por policia kufitare t’i kontrolloj dhe ta pengojnë kontrabandën”, ka theksuar kryetari Haziri.

Në fund, Haziri ka pohuar se trekëndëshi Gjilan-Kumanovë-Preshevë është shembulli më i mirë i bashkëpunimit në Ballkanin perëndimor.

Ndërkaq, kryetari i Kumanovës, Zoran Damjanovski, e ka falënderuar kryetarin Haziri për vizitën dhe bashkëpunimin e ofruar për t’ua lehtësuar jetën qytetarëve të të dyja komunave./rajonipress/