Lulzim Aliut i ndihmojnë mërgimtarët për ta ndërtuar shtëpinë e re

Gjilan – Lulzim Aliu nga Llovca falë zemrës së madhe që kanë treguar mërgimtarët dhe donatorët pritet të bëhet me shtëpi të re. Aliu mendon që edhe Komuna e Gjilanit do ta ndihmojë pasiqë është në listën e komunës për të përfituar nga aksioni për ndërtimin e shtëpive për nevojat e rasteve sociale.

Falë mërgimtarëve dhe donatorëve shpirt bardhë familja e Lulzim Aliut do të bëhet me shtëpi të re.

Ibrahim Shabani pensionist dhe mërgimtar në Zvicër duke e parë gjendjen e rëndë të Lulzim Aliut ka ndërmarrë një aksion për grumbullimin e mjeteve financiare për ta bërë me kulm mbi kokë këtë familje. “Jam i kënaqur me njerëzit vullnetmirë. Së pari familja ime e ngushte pastaj edhe donatorët e tjerë e përkrahën idenë time për ta ndihmuar Lulzim Aliun. Kemi mbledhur gjysmën e mjeteve dhe presim që edhe komuna të paktën të participojë me një pjesë të mjeteve” tha Shabani.

Lulzim Aliu ndërkaq tha se ndihet shumë i kënaqur që një pjesë e bashkëfshatarëve të Llovcës kanë marrë këtë iniciativë. “Unë kam pasur nevojë të madhe dhe po shpresojë që aksioni do të ketë përkrahje. Zoti i shpërbleftë të gjithë ata që së pari vetëm kanë menduar për mua dhe rastin tim” tha Aliu./rajonipress/