Shoqata e Gazetarëve “Etika” nga Lugina e Preshevës dhe shoqëria civile me shqetësim të madh e shohin këtë datë nga më të rëndësishme të Lirisë së Shtypit në botë, për fatin e keq të medieve, veçmas në rajonin e komunave: Preshevë, Bujanoc dhe Medvegjë.
Derisa sa në botë Liria e Shtypit, konsiderohet diçka e madhe dhe me vlerë për shoqërinë bashkëkohore, kjo tek ne shikohet ndryshme, nga një kënd primitiv, duke sjell fatin e medieve në gjuhën shqipe më keq se sa ne periudhën komuniste.
Të kota ishin përpjekjet e ndërkombëtarëve, gjatë viteve 2002 e këndej, që në Luginë të Preshevës, përmes OSBE-së, të riorganizohen mediet lokale multietnike, në mënyrë që ato të avancohen sipas standardeve ndërkombëtare. Mirëpo, me procesin e privatizimit të medieve, që kishin për themelues pushtetet lokale dhe ato shtetërore, gjendja e informimit shqip në këto hapësira është e vështirë dhe pa shpresa se mund të avancohet.
Faji për këto pengesa të natyrës politike, së pari e bartin përgjegjësit e pushteteve lokale, pastaj edhe ato shtetërore, të cilat të sinkronizuara, favorizuan mediet partnere te koalicioneve qeverisëse, duke shkelur dhe shuar mediet profesionale dhe tradicionale.
Ndarja e fondeve për zhvillimin e medieve në gjuhën shqipe, bëhet në mënyrë të njëanshme, duke i ndihmuar financiarisht, vetëm ato medie që shkruajnë dhe raportojnë për politikën e pushteteve dhe bizneseve për qëllime të caktuara.
Portali “Jetapress”, për këtë ditë kaq të rëndësishme të lirisë së shtypit në botë, shkëputi një deklaratë nga drejtuesi i Shoqatës së Gazetarëve “Etika” dhe koordinatori i shoqërisë civile, Nexhmedin Saqipi, i cili nuk heziton të thotë publikisht, se në Luginë të Preshevës, nuk ka medie të pavarura, por aso të cilat u shërbejnë politikës lokale, për një grusht para, me të cilat nuk arrijnë t’i mbulojnë shpenzimet e zyrave e lere më të veprojnë në shërbim të informimit.
“Liria e Shtypit, si diçka e shenjtë për shoqërinë tonë, e liruar nga censura komuniste, por e rënduar nga gjendja ekonomike, nuk funksionon ashtu si duhet. Vendi ynë, mjerisht, përballet me këto dukuri negative, të cilat informimin e çojnë para një shkatërrimi të paarsyeshëm. Informimi kjo fuqi e shtatë botërore dhe e katërta në nivel shteti, po përballet me kushte shumë të vështira sa nga censura e sa na kamxhiku financiar. Deri sa nuk kemi liri të shtypit dhe gazetari të pavarur, shoqëria jonë nuk lirohet nga mentalitetet e mbrapshta, për t’i sunduar mediet për qëllime politike, partiake e klanore”, thotë i mllefosur Saqipi.
Në Luginë të Preshevës, janë duke u shënuar këto data të rëndësishme për lirinë e shtypit, përveç ndonjë deklarate të shtëpive mediale dhe të ndonjë politikani, i cili flet për gazetari a nga ana tjetër i diskriminon ato mbi baza profesionale. Shoqëria jonë edhe në të ardhmen do të përballet me këso dukuri të dëmshme, të cilat po i kushtojnë shtrenjtë informimit shqip në këto hapësira, thuhet në një koment të Jetapress-it.
