Ish-shefi i Shërbimit Informativ Kombëtar (SHIK), Fatos Klosi, i është kundërpërgjigjur zëdhënëses së kabinetit të kryeministrit Sali Berisha, njëherësh ministre e Integrimeve, Majlinda Bregut, në lidhje me akuzat për trafikim armësh.
“Lufta me ushtrinë serbe në Kosovë, nuk bëhej me llastiqe dhe unë kam bërë atë që më është dukur më e mira për kombin tim, shpesh, edhe duke u përplasur me shefat e mi. Nuk e di me se merrej zonja Bregu në atë kohë, se sa për shefin saj, e di mirë”, ka thënë Klosi, raporton www.shqiptarja.com.
Bregu në deklaratën e saj e ka akuzuar Klosin se ka qenë në ndjekje nga Sigurimi sekret shqiptar, për bashkëpunim me agjenci të huaja sekrete dhe për trafikun e armëve.
“Dua t’i ritheksoj zonjës Bregu, se shefi e ka futur në një hulli gënjeshtrash, që vetëm ai di t’i sajojë… Për sa i takon akuzës së trafikut të armëve, që unë paskam bërë, duhet t’i kujtoj zonjës Bregu se luftën për çlirimin e Kosovës unë e kam konsideruar dhe trajtuar në mënyrë shumë të ndryshme nga ç’e trajtoi shefi i saj”.
“Unë nuk i kam parë kurrë luftëtarët e UÇK-së si ‘marksistë të pandreqshëm’, por i kam konsideruar si djem e vajza, që po rrezikonin jetën për një kauzë, që duhet ta përkrahnim të gjithë shqiptarët”
