Luan Krasniqi vrapon për fëmijët e Kosovës

Më 7 prill ai vrapon në gjysmëmaratonë në Freiburg të Gjermanisë për të sensibilizuar opinionin për punën e strehimoreve të fëmijëve SOS Kinderdorf në Kosovë.

Ish kampioni evropian në kategorinë e rëndë të boksit profesionist, Luan Krasniqi ka vendosur që më 7 prill të marrë pjesë në shtegun e gjysmëmaratonës në kuadrin e garës së maratonës së Freiburgut. Këtë angazhim të ri vullnetar sportiv, Luani e ka marrë për një qëllim humanitar ai dëshiron të sensibilizojë opinionin për punën e strehimoreve të fëmijëve SOS Kinderdorf në Kosovë.

Krasniqi ka filluar prej kohësh stërvitjet së bashku me mjekun Aldo Berti, po ashtu me prejardhje kosovare. Që të dy me pjesëmarrjen e tyre në maratonën e Freiburgut dëshirojnë të japin sinjalin për ndihma drejtuar qendrave SOS Kinderdorf në Kosovë.

Maratona e Freiburgut që e përshkon qytetin zhvillohet me moton “Rock&Run”. Në margjina të garës nëpër qytet do të ketë oferta muzikore nga roku deri te muzika klasike.(albinfo)