Lirim Jakupi në rigjykim para EULEX-it

Gjilan – Gjykata e Qarkut në Gjilan e udhëhequr nga gjykatësit e EULEX-it ,Vlladimir Mikula, Mariola Pasnik dhe Vllastimir Dimiq janë duke dëgjuar dëshmitë dhe provat në rastin e Lirim Jakupit.

Lirim Jakupi ish luftëtar i UÇPMB-së i njohur me nofkën e luftës “Nazi” sërish është duke u paraqitur në një proces gjyqësor në Gjykatën e Qarkut në Gjilan të cilën po e udhëheqin gjykatësit e EULEX-it. Rasti i Jakupit është kthyer në rigjykim nga ana e Gjykatës Supreme të Kosovës.

Ndonëse,Lirim Jakupi ishte dënuar me gjashtë vite burgim nga ish gjykatësi i UNMIK-ut Vinod Bolello, rasti i tij është kthyer në rigjykim tha për Rajonipress, avokati Bajram Krasniqi. Krasniqi tha se ndaj Lirim Jakupit nuk ka aktakuzë shtesë,pos asaj që është ngritur në vitin 2003 nga ana e prokurores ndërkombëtare,Elizabet Ren.

Sipas Krasniqit ,Lirim Jakupi është në përfundim të vuajtjes së dënimit dhe realisht ndaj tij nuk ka as aktakuzë të ngritur për ikjen e tij nga Burgu i Dubravës.”Unë kam kërkuar me shkrim që a`i të lirohet nga burgu,por ndërkohë me rastin e tij është duke u marrë një avokat gjilanas,sipas detyrës zyrtare” sqaroj Krasniqi.

Në zyrën e EULEX-it në Gjilan (Gjykata e Qarkut), askush nuk ka dashur të flas për rrjedhën e gjykimit. Ndërsa avokati sipas detyrës zyrtare Nasuf Nasufi tha se nuk guxon të flas pa lejen e EULEX-it.

Ndërkohë Rajonipress ka kërkuar zyrtarisht një aktakuzë nga kryetari i trupit gjykues Vlladmir Mikula,i cili i është përgjigjur pozitivisht,duke e dërguar me postë elektronike.

Derisa ,Bajram Krasniqi thotë se aktakuza ndaj Lirim Jakupit që nga fillimi ka qenë e paqëndrueshme,sipas Elizabet Renit, Jakupi akuzohet për periudhën e vitit 2003 i cili së bashku me Asllan dhe Rasim Bajramin dhe Basri Xhemailin kanë qenë duke u përgatitur për një akt terrorist në territorin e Serbisë.

Ren e ngarkon, Jakupin edhe si pjesëmarrës në një akt terrorist të kryer në vitin 2003 ndaj dy policëve serb në punktin policor në Konqul të Serbisë .

Jakupi akuzohet për veprat penale të shtytjes, asistencë apo kryerje të terrorizmit. Sipas avokatit Krasniqi aktakuza e prokurores Ren është e paqëndrueshme sepse në këtë rast nuk ka dëshmitarë dhe se Lirim Jakupi në atë aktakuzë përmendet vetëm kalimthi.

“Tek e fundit Jakupi po gjykohet për një rast që është gjykuar në Gjykatën e Gjilanit dhe ku janë shpallur të pafajshëm Asllan Bajrami,Rasim Bajrami dhe Basri Xhemaili.
Rasti i Jakupit është tejet interesant,meqë ishte arrestuar më 20 dhjetor 2004 nga policia e UNMIK-ut.

Atë kohë Jakupin e bënte përgjegjës prokurorja tjetër ,Cecelija Tilliada,dhe e ngarkonte për tri vepra penale të detyrimit ,katër vepra penale të rrëmbimit dhe tri vepra penale të shtrëngimit. Jakupi në këtë gjykim u shpallë fajtor së bashku me ish komandantin e UÇPMB-së, Shefket Musliun,dhe mori një dënim unik prej gjashtë viteve burg.

Aktakuza e dytë ndërkaq e ngarkon Jakupin për periudhën e vitit 2003 i cili së bashku me Asllan dhe Rasim Bajramin dhe Basri Xhemailin,kanë qenë duke u përgatitur për një akt terrorist në territorin e Serbisë.

Në gjykimin e grupit të Asllan Bajramit kanë dëshmuar disa dëshmitarë dhe ai së bashku me Rasimin dhe Basriun janë liruar të pafajshëm nga Gjykata e Gjilanit në gusht të vitit 2004 , pasi u publikuan analizat e ADN-së, të bëra në Institutin Kërkimor të Mjekësisë Ligjore në Bullgari të cilat nuk e implikonin këtë grup në aktet terroriste siç saktësonte aktakuza.

Historia e Lirim Jakupit nuk ndalet këtu. Atij,Gjykata Supreme e Serbisë i kishte vërtetuar dënimin prej 15 vitesh burg,meqë Gjykata e Vranjës në vitin 2003 ,në mungesë e kishte dënuar dhe shpallur fajtor.

Në vendimin e Gjykatës Supreme të Serbisë është thënë se “ Lirim Jakupi ish komandant lokal i UÇPMB-së i cili tani ndodhet në arrati i është vërtetuar dënimi prej 15 vitesh,për shkak të veprimtarisë së tij armiqësore që i përkiste grupit të Shefket Musliut”.

Ky vendim i gjykatave të Serbisë ishte kritikuar ashpër atëkohë nga Bajram Krasniqi. “Për mua ky vendim ishte jovalid sikurse që është një aktakuzë e paqëndrueshme edhe e prokurorëve ndërkombëtar në rastin Jakupi”pati thënë Krasniqi.
Sipas tij të njëjtat akuza të fabrikuara nga ana e inspektorëve të sigurimit shtetëror të Serbisë janë shfrytëzuar edhe nga UNMIK-u në Kosovë. /rajonipress/

Shpërndaje.
© RAJONIPRESS