Ligji për pagën minimale s’ka shkuar ende në Presidencë për dekretim

Ndonëse kanë kaluar më shumë se tri ditë, Ligji për pagën minimale ende nuk ka shkuar në Zyrën e Presidentes së Kosovës për dekretim. Nga Zyra e Presidentes kanë bërë të ditur se pasi të marrin dokumentin, e para e shtetit do të vendosë të dekretojë ose jo ashtu siç kanë kërkuar veteranët e UÇK-së që nuk janë përfshirë në këtë ligj.

Zyra e Presidentes së Kosovës është shpresa e fundit për veteranët e Ushtrisë Çlirimtare të Kosovës.

Nga presidentja Vjosa Osmani ata vazhdojnë të kërkojnë njëjtë sikurse të shtunën në protestë që të mos e dekretojë ligjin që la jashtë përfitimit të pagës minimale këtë kategori.

Ndonëse kanë kaluar më shumë se tri ditë që kur deputetët e mazhorancës pa praninë e opozitës votuan ligjin për pagën minimale, i njëjti ende nuk ka shkuar për nënshkrim në Presidencë.

“Ligji është ende në Kuvendin e Kosovës dhe nuk ka ardhur në Presidencë. Kur të vijë, do të analizohet sikurse edhe ligjet e tjera”, ka thënë për Dukagjinin Bekim Kupina, këshilltar për media.