Ligjëratë vetëdijësuese për parandalimin e bullizmit në shkollën “Abdulla Tahiri” në Gjilan

Gjilan – Policia e Kosovës, përmes Njësisë për Sektor dhe Komunitet të Stacionit Policor në Gjilan, ka zhvilluar më 30 mars 2026 një ligjëratë vetëdijësuese me temën “Parandalimi i bullizmit” në ambientet e Shkolla Fillore Abdulla Tahiri në fshatin Malishevë.

Ligjërata u mbajt me nxënësit e klasave të teta dhe të nënta, me qëllim ngritjen e vetëdijes për rëndësinë e krijimit të një mjedisi të sigurt dhe të shëndetshëm në shkollë. Gjatë aktivitetit, nxënësit u informuan për format e ndryshme të bullizmit, pasojat që ai shkakton si dhe mënyrat konkrete për ta parandaluar dhe raportuar atë.

Aktiviteti u zhvillua në mënyrë interaktive, duke u dhënë mundësi nxënësve të ndajnë mendimet dhe përvojat e tyre, çka ndikoi në një diskutim të hapur dhe konstruktiv.

Personeli arsimor dhe nxënësit e mirëpritën këtë ligjëratë, duke e vlerësuar si shumë të dobishme për rritjen e ndërgjegjësimit dhe marrjen e njohurive të reja mbi këtë fenomen shqetësues.

Policia e Kosovës thekson se do të vazhdojë me aktivitete të tilla parandaluese dhe bashkëpunim të ngushtë me institucionet arsimore, me synim rritjen e sigurisë dhe vetëdijesimit të të rinjve./rajonipress/