Liderët kosovarë, “të zënë ngushtë” për Gjykatën i thonë PO në parim krijimit të saj

Drejtori për Evropën Qendrore dhe Juglindore në Departamentin Amerikan të Shtetit, Jonathan Moore duket se i ka tronditur kogja shumë udhëheqësit vendor por jo pak edhe përfaqësuesit e BE-së pasi që pas vizitës së fundit të tij në Kosovë gjërat filluan të ecin në drejtim të krijimit të Gjykatës së Veçantë për gjykimin e krimeve të mundshme të UÇK-së.

Sot kanë pas një takim shefat e partive politike në vend me ambasadorët e vendeve te Quint-it dhe përfaqësuesin e BE-së në Kosovës, Samuel Zhbogar.

Në takim kanë marrë pjesë kryetari i PDK-së, Hashim Thaçi, kryetari i LDK-së, Isa Mustafa, ai i AAK-së, Ramush Haradinaj dhe kryetari i Parlamentit, Jakup Krasniqi.

Të pranishmit në parim janë pajtuar në mënyrë konsensuale për krijimin e Gjykatës së Veçantë që po kërkohet për gjykimin e krimeve të mundshme të UÇK-së.

Ky takim dhe pajtimi i arritur na parim, është arritur pas vizitës së Drejtori për Evropën Qendrore dhe Juglindore në Departamentin Amerikan të Shtetit, Jonathan Moore i cili hapur kërkoi krijimin e një Gjykate të Veçantë për krimet e mundshme që do të dalin si rezultat i punës hetimore të prokurorit amerikan, Clint Ëilliamson, udhëheqës i taskforcës për hetime speciale.

Burime ndërkombëtare të “Zërit” thonë se vizita e amerikanit ka qenë shenjë që gjërat duhet të ecin shumë shpejtë në këtë drejtim.

Pajtimi në parim nënkupton krijimin e një Gjykate të Veçantë me dy dhoma, njëra në Kosovë dhe tjetra jashtë saj.

Një takim i njëtë do të mbahet edhe të premten. /Zëri/