Liderët e partive pa konsensus për reformën zgjedhore

Prishtinë, 16 maj – (E plotësuar) Kryeministri i vendit, Hashim Thaçi, kreu i LDK-së, Isa Mustafa, nënkryetari i AAK-së, Blerim Shala dhe ai i AKR-së, Ibrahim Makolli, përfaqësuesi i BE-së Samuel Zbogar, shefi i ICO-se, Peter Feith si dhe ambasadorët ai i OSB-së dhe ambasadori britanik janë mbledhur në një drekë punë për të diskutuar për reformën zgjedhore konkretisht për katër pikat për të cilat komisioni për reformën zgjedhore nuk ka pasur konsensus.

Këtë takim e ka bojkotuar kreu i Lëvizjes Vetëvendosje, Albin Kurti. Ndërsa pikat të cilat komisioni nuk arrit të akordohej janë: puna e listave, zonat zgjedhore, pragu zgjedhor si dhe shpërndarja e mandatëve.

Siç raporton KTV, partitë politike vazhdojnë të mbajnë qëndrimet e tyre sa i përket zonave zgjedhore, propozime këto që nisin nga 6 deri 100 zona zgjedhore.

Pas takimit liderët e partive nuk kanë dashur të flasin për media. Kryetari Komisionit për reformën zgjedhore, Haki Demolli ka bërë të ditur se edhe pse nuk ka pasur konsensus në këtë takim, një marrëveshje për këtë pritet të arrihet në tre muajt e ardhshme aq sa ka mandat edhe ky komision.

Demolli ka potencuar se përfaqësuesit ndërkombëtar kanë kërkuar që sistemi zgjedhor të jetë i thjeshtë. Po ashtu ata kanë kërkuar që ky sistem të mundësojë që vota e qytetarit të përçohet në Kuvendin e Kosovës.

Demolli ka paralajmëruar se me 30 maj do të mbahet takimi i ardhshëm ku të gjitha partitë politike janë të obliguara që deri më këtë datë të marrin një vendin në mënyrë që t’i prezantohen më pas komisionit propozimet dhe më pas të shikohet mundësia e një marrëveshjeje.

Shpërndaje.
© RAJONIPRESS