Liderët e Luginës, të ndarë rreth lapidarit

Liderët e Luginës së Preshevës kanë qëndrime të ndryshme rreth çështjes së lapidarit të dëshmorëve të UÇPMB-së, i cili u largua para një muaji nga forcat e xhandarmerisë serbe. Disa këmbëngulin se lapidari duhet të kthehet në vendin ku ishte i vendosur para komunës së Preshevës, disa konsiderojnë se një gjë e tillë nuk ka gjasa të ndodhë porse duhet të shikohet në gjetjen e ndonjë alternative.

Ndonëse ishte pritur që ata të takoheshin me presidentin dhe kryeministrin e Serbisë, pikërisht për këtë punë, një gjë e tillë nuk pritet të ndodhë. OSBE-ja të paktën ka arritur t’ua aranzhojë një takim me përfaqësuesit e ambasadave ndërkombëtare të cilat janë të vendosura në Serbi, shkruan “Tribuna”.

Ish-përfaqësuesi politik i UÇPBM-së dhe lideri i partisë opozitare Lëvizja e Progresit Demokratik, Jonuz Musliu, ka thënë se gjatë këtij takimi pritet që të bëhet e qartë edhe një herë pozicioni i përfaqësuesve të Luginës së Preshevës për kthimin e lapidarit në vendin nga është larguar.

“Nga ne është kërkuar që të bëjmë një paketë të kërkesave dhe ne e kemi bërë një gjë të tillë, e në mesin e kërkesave është edhe kthimi i lapidarit aty ku ka qenë”, ka thënë Musliu.

Duke folur rreth kritikave të kryeministri Thaçi, se pse nuk i kanë dalë në mbrojtje lapidarit, Musliu ka thënë se ka qenë e pamundur t’i dilet përballë një xhandarmerie të armatosur deri në dhëmbë.

“Dihet se ne as nuk kemi ushtri e as polici. Por në format dhe mënyrat që është dashur të veprohet, ne kemi vepruar duke e mbrojtur lapidarin, sa i përket gjuhës së Thaçit, ai nuk e ka gjuhën e arsyes, pra ai ka folur pa arsye”, ka thënë Musliu për gazetën “Tribuna”.

Mirëpo deputeti, Riza Halimi ka mendim krejt tjetër nga Musliu. Sipas tij, kërkesa e disa përfaqësueseve të Preshevës për kthimin e lapidarit në vendin ku ka qenë, nuk do të ketë sukses.

“Është e paqartë që Mustafa e Musliu kërkojnë kthimin e lapidarit në vendin ku ishte. Një gjë e tillë pas rrjedhave që kanë ndodhur, është e pamundur. Ne e patëm mundësinë që ta gjenim një zgjidhje para veprimit të xhandarmerisë serbe për ta larguar lapidarin, por liderët tanë këmbëngulën që lapidari të qëndronte në vendin e vet dhe ndodhi ajo që ndodhi”, ka thënë Halimi. /Telegrafi/