Libri “Portretizime eseistike” libër zbërthyes e vlerësues

Gjilan – Arsim Halili poet e krijues nga Kosova Lindore ka qitur në dritë librin e tij më të ri “Portretizime eseistike”të botuar nga shtëpia botuese “Beqir Musliu”. Recensenti Prend Buzhala ka thënë se me këtë libër Arsim Halili përpiqet të sjell risitë e tij të frymës bashkëkohëse, me gjuhë eseistike e diskurs estetik bashkëkohës.

Arsim Halili krijues nga Kosova Lindore nuk po ndalet me botimet e reja dhe me prirjet e tij që po i shpreh edhe në zhanre tjera e krijime që do i mbesin si dhuratë gjeneratave më të reja.

Libri i tij më i ri i titulluar “Portretizime eseistike” që u botua nga shtëpi botuese “Beqir Musliu” me redaktor Sabit Rrustemin, ( i cili gjithmonë po i përkrah e stimulon krijuesit ambicioz), trajton portretizimin e krijuesve te njohur shqiptar siç janë Agim Vinca, Bajram Kosumi, Ibrahim Kadriu, Mexhid Mehmeti, Myrvete Dreshaj- Baliu, Nexhat Rexha, Ramiz Kelmendi, Ramadan Mehmeti, Sabit Rrustemi, Sabile Keqmezi – Basha, dhe Sunaj Raimi.

Prend Buzhala krijues në recensionin e tij ka thënë se libri shquhet për unitetin e tij tematik e zbërthyes, mbarështrues e vlerësues.

Libri sipas Buzhalës portretizon kryesisht figurat që janë nga rajoni i Anamoravës dhe Kosovës Lindore. Megjithatë libri paraqet prirjen për gjithëpërfshirje, objektivisht prirjen për kundrime pasionuese dhe të larushisë cilësore spikat Buzhala.

Sipas , Buzhalës portretizimet shpërfaqen në aktin estetik, kurse gjithëpërfshirja shqiptohet e realizohet nëpër fusha të ndryshme të krijimtarisë imagjinative dhe në atë të krijimtarisë diskurseve.

Gjithnjë sipas Buzhalës në portretizime krijuesit bashkëbisedojnë me ne, me kohët dje e me kohën sot, me porositë dhe kënaqësitë e dhembjet krijuese, që pranojnë aktivizimin e lexuesit.

Arsim Halili në këtë libër përpiqet të sjellë risitë e tij të frymës bashkëkohëse, me gjuhë eseistike e diskurs estetik bashkëkohës ka thënë në fund Buzhala. /rajonipress/