Libri “Adem Stançiqi” plotësim i boshllëkut institucional e akademik

Gjilan – Përmes figurës së Adem Stançiqit, që është bërthama përmbajtësore dhe lajtmotivi i këtij libri,ne e kuptojmë më mirë kohën në të cilën jetuan shqiptarët ka thënë në parathënien e librit Emin Azemi.

Rahim Azemi vjen para publikut lexues me librin e tij të dytë,pas atij “Letrat pa përgjigje”. Libri i tij i dytë i titulluar “Adem Stançiqi-profili socio psikologjik”, është më tepër një rrugëtim shumë i sigurt, jo emocional dhe krejtësisht i arsyeshëm, në pasqyrimin e një periudhe sa të vështirë,sa sfiduese,aq të rëndë e provokuese.

Për librin e Rahim Azemit kanë shkruar dy gazetar e publicist Emin Azemi dhe Nexhat Buzuku të cilët në trajtesat e tyre kanë vlerësuar lartë angazhimin profesional dhe të palodhshëm disa vjeçar të autorit, duke e kuptuar librin e tij si plotësim të boshllëkut institucional e akademik për të afirmuar figurat e merituara të kombit,por edhe si respekt e kujdes ndaj tyre.

Emin Azemi në parathënien e librit ka thënë se përmes figurës së Adem Stançiqit, që është bërthama përmbajtësore dhe lajtmotivi i këtij libri,ne e kuptojmë më mirë kohën në të cilën jetuan shqiptarët .Sipas tij trajtimi monografik i figurës së Adem Stançiqit vjen në kohën kur Shqipëria Londineze po kremton 100 vjetorin e pavarësisë.

“Autori ka marrë mbi vete një barrë të madhe kur ka vendosur që simbolikën e këtij udhëtimi njëshekullor të shqiptarëve ta shtrijë edhe në kontekstin e ndriçimit të një personaliteti,i cili padrejtësisht është mbajtur në harresë nga shoqëria e gjerë” ka spikatur Azemi.

Gjithnjë sipas Emin Azemit, autori i librit ka arritur të portretizojë figurën morale,kombëtare e njerëzore të Adem Stançiqit duke i afirmuar linjat dalluese të një prijësi. “Sfondi socio –psikologjik i krejt materies së librit ka në prapavijë një kronologji ngjarjesh e personash,të cilët futen në strukturën e librit si aktorët në skenën e një teatri. Zgjerimi i figurës së Adem Stançiqit në plotëninë e librit është proporcional me zgjerimin e autoritetit dhe ndikimit të tij në fshat,në Karadak dhe më gjerë” ka thënë ai.

Emin Azemi me të drejtë ka thënë se libri i Rahim Azemit ka për qëllim të argumentojë shkencërisht se asnjë figurë historike nuk vjen vetvetiu,spontanisht,por asaj i paraprijnë disa rrethana të brendshme e të jashtme.”Adem Stançiqi kishte arritur ta sfidonte krimbin e pushtetit,për dallim nga disa të tjerë që u bënë ushqim i freskët për krimbat e uritur të pushteteve e pushtuesve të ndryshëm”ka nënvizuar Azemi.

Edhe gazetari Nexhat Buzuku në pasthënien e librit ka thënë se autori i librit përmes kryepersonazhit Adem Stançiqi dhe personazheve të tjerë të shumtë,që njëkohësisht përbënin shumësinë e forcës kundërshtuese që përditë po shtohej,dhe fuqisë refuzuese ndaj pushtuese,të dritësojë përpjekjet,përkushtimin e brezave të një kohe dhe epoke për ta përmbysur atë kohë dhe epokë për hir të të resë,të lirisë dhe kthimit në vetvete e për vete nga një tjetërsim mbytës e poshtërues.

Sipas Buzukut trajtesa historiko-sociopsikologjike për etninë në ringjallje e mbijetesës nga prangat e të huajit ,shkelësit dhe plasaritjet e kontradiktat e brendshme,megjithatë përvijon aspiratën e lirisë dhe dinjitetit etnik.

“Autori i librit përmes trajtesës së tij përçon porosinë që të mos lejojmë kthimin e kohëve të mugëta,të iluzioneve,e utopive,të provincializmave e krahinarizmave,që të mos e mbysim e ngufasin idenë e gjithmonshme të lirisë e shtetësisë për hir të ndonjë interesi kapricioz,personal e farefisnor” ka shkruar Buzuku.

Ndryshe ,Rahim Azemi është njëri nga 238 intelektualët shqiptarë të Kosovës të cilët regjimi serb në mars të vitit 1989 i kishte izoluar për shkaqe politike duke i dërguar në burgjet e Serbisë, në Leskovc,Vranjë,Shabac etj.
Në vitin 1989 është shpallur si profesori më i mirë në Kosovë. Aktualisht është drejtor në shkollën e Mjekësisë në Gjilan./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).