Letra prekëse e kolektivit të shkollës kushtuar Mirlinda Ibrahimit: Vdekja të godet tinëzisht

Gjilan – Thellësisht të pikëlluar nga vdekja tragjike e nxënëses sonë Mirlinda Ibrahimi. Ajo sapo kishte përmbyllur katërmbëdhjetë pesa në të katërmbëdhjetë lëndët që i kishte në klasën e njëmbëdhjetë dhe tashmë shikimin e kishte hedhur nga klasa e dymbëdhjetë të cilën do ta fillonte në shtator. Si një vajzë ambicioze kishte menduar edhe për të ardhmen dhe pas përfundimit të shkollës së mesme vetën e shihte si një studente e më tej edhe si një profesioniste në shërbim të vendit dhe popullit.

Por të gjitha këto ëndrra, këto dëshira e këto ambicie u shuan në natën e dymbëdhjetë qershorit, kur tragjikisht, ju shua jeta, nxënëses së shkëlqyer të Shkollës së Agrobiznesit dhe Teknologjisë ”Arbëria” të Gjilanit, Mirlinda Ibrahimi.

Mirlinda ishte e dalluar në mësime, ishte shembullore në sjellje, ishte e dëgjueshme për mësimdhënësit, ishte e afërt dhe e vullnetshme me shokët dhe shoqet e klasës, të cilëve nuk hezitonte asnjëherë të ju afronte ndihmë dhe mbi të gjitha kishte një vullnet të fortë për të arritur nivelet më të larta.

Me vdekjen e saj familja humbi vajzën e saj të dashur, qyteti ynë Gjilani humbi një vajzë të edukuar, të emancipuar dhe intelegjente, ndërsa mësimdhënësit, nxënësit e klasës XI-1 dhe të gjithë nxënësit e Shkollës së Agrobiznesit dhe Teknologjisë “Arbëria” humbën nxënësen, përkatësisht shoqen shembullore.

Me fjalën Mirë fillonte emri yt, të mira i kishe sjelljet dhe veprat, të gjitha mirësitë kishin zënë vend në zemrën tënde rinore dhe për të mira do të kujtohesh gjithmonë nga të gjithë ata që të kanë njohur. Pusho e qetë në Parajsë nxënësja jonë shembullore thuhet në letrën e dërguar nga shkolla e Agrobiznesit./rajonipress/