Letra e Kurtit për Abdixhikun pasi i quajti hajvanë opozitën, Haziri: Për shumëkënd befasuese, por jo për mua
RajoniPress
19:25, 7 Prill, 2025
| 2 muaj më parë
Kryetari i Lëvizjes Vetëvendosje njëherësh kryeministri në detyrë i Kosovës Albin Kurti, i ka dërguar një letër kryetarit të Lidhjes Demokratike të Kosovës Lumir Abdixhikut.
Kurti përmes kësaj letre e ftoi Abdixhikun, për konsultime para konstituimit të Kuvendit e cila do të mbahet më 15 prill.
”Me qëllim të konstituimit të plotë të Kuvendit të Republikës së Kosovës dhe procesit të zgjedhjes së Qeverisë së re, për t’u konsultuar paraprakisht, ju ftoj në takim të mërkurën, me datë 9 prill, në orën 15:00, apo të enjten, me datë 10 prill, në orën 9:00 ose në 14:00”.
Pikërisht rreth kësaj letre, në emisionin DPT te Fidani në Klan Kosova, foli numri dy i LDK-së, Lutfi Haziri.
Haziri deklaroi se ky veprim i Kurtit është veprim politik.
“Për shumëkënd befasues pas asaj deklarate, por jo për mua dhe LDK-në. Ka pasur situata edhe më të vështira karshi LDK-së dhe liderëve të LDK-së, por LDK-ja gjithmonë ka rezonuar politikisht edhe ka vepruar politikisht”, deklaroi Haziri.
Letra e Kurtit ka ngjallur reagime të mëdha në opinionin, pasi ky i fundit i kishte quajtur “Hajvana” partitë opozitare, mbrëmjen kur Lëvizja Vetëvendosje e shpalli fitoren.
Nuk dihet nëse kreu i Vetëvendosje i ka dërguar ftesë për konsultime edhe partive tjera opozitare.
