Lenjani: I lumtur që iu bashkova FC Nantes!

Pas stërvitjes së parë me FC Nantes, paraditen e së martës, Ermir Lenjani u paraqit zyrtarisht para medias së bashku me lojtarin Franck Kita dhe trajnerin Michel Der Zakarian.

Futbollisti i kombëtares shqiptare është huazuar në këtë klub popullor francez për 1 vit, me të drejtë blerjeje të kartonit të tij, të cilin e posedon Rennes.

Sidoqoftë, në deklarimin e parë për mediat, Lenjani tha se e ka mbyllur kapitullin “Rennes” dhe tashmë mendon vetëm për klubin e ri. Zëdhënësi i FC Nantes tha paraprakisht se janë të kënaqur nga marrëveshja e arritur për Ermir Lenjani, të huazuar dhe me opsionin e blerjes së ndërkombëtarit shqiptar.

Në konferencën për shtyp, mes të tjerash, Lenjani u shpreh në gjuhën angleze, çka tregon se me frëngjishten ka probleme: “Mendova se kisha bërë zgjedhjen e duhur duke kaluar te Rennes, në janarin e këtij viti, por nuk më eci mbarë. Fillimisht u dëmtova, çka më bëri të humb një pjesë të mirë të kampionatit të kaluar. U ritheva dhe mora një karton të kuq, duke e ngatërruar më keq eksperiencën time në këtë klub, transmeton telesport.

Me kalimin e kohëve kuptova se kisha pak shanse aktivizimi te Rennes, ndaj ua bëra të ditur drejtuesve se dua të iki diku tjetër, sepse nuk jam lojtar stoli. Jam i lumtur që u transferova te FC Nantes, një ekip me emër dhe që ka një trajner shumë të mirë. Nuk kam folur me miqtë e mi për FC Nantes gjatë kësaj kohe, por e di se bëhet fjalë për një klub të mirë këtu në Francë. Shpresoj të zhvilloij ndeshje sa më të mira dhe t’i kënaq drejtuesit e tifozët me paraqitjen time.

Për mua është shumë pozitiv fakti se trajneri i FC Nantes beson në aftësitë që kam, ndërsa jam bërë pjesë e një klubi popullor. Në Zvicër, te St Gallen, kam luajtur si mbrojtës i majtë, në ekipin kombëtar varet nga moduli që aplikon trajneri, 3-5-2 apo 4-4-3. Kam bërë edhe mesfushorin e majtë. A pres të luaj këtë fundjavë me FC Nantes? Patjetër që po. Fizikisht jam në gjendje optimale, jam stërvitur rregullisht dhe jam gati për lojë.

Sidoqoftë, kam kryer vetëm stërvitjen e parë këtu te FC Nantes, dua pak kohë të njihem me grupin. Pastaj, është trajneri, ai që vendos për gjithçka. A do të kem rivalitet në përplasjet me Rennes? Për mua kjo eksperiencë ka mbaruar, tani jam lojtar i FC Nantes dhe mendoj vetëm për këtë fanellë. Do të jap maksimumin tim për të.”

Ndërkohë, trajneri i FC Nantes, që ishte i pranishëm në prezantimit e Lenjanit, është shprehur i kënaqur për këtë përforcim, duke e konsideruar lojtarin e kombëtares shqiptare “polivalent”, që mund ta përdore në disa role. Kujtojmë se kur arriti te Rennes, në janar të vitit 2015, Ermir Lenjani kishte luajtur gjashtë ndeshje me fanellën kuqezi.