Lenjani: E festuam ditën e Flamurit nën ethet e copëtimit të Karaqevës?

Gjilan – Selver Lenjani kryetar i bashkësisë lokale në Karaqevë thotë se festa e Flamurit i gjeti nën ethet e copëtimit të Karaqevës, problem ky i pazgjidhur tash e 17 vite pas luftës.

Lenjani vazhdon të jetë i brengosur me fatin e vijës kufitare në Karaqevë. “Edhe tani në rizgjedhjen time në krye të Karaqevës preokupim imi jetësor mbetet definimi i vijës kufitare me Serbinë. Kemi mbetur keq dhe jemi nën ethet e vazhdueshme se çfarë do të ndodhë me fatin e Karaqevës. Edhe festa e Flamurit po festohet zbehtë sepse kemi hallin e qindra hektarëve tokë që Serbia pretendon se janë të saja, a në fakt i tërë dokumentacioni dhe hartat kadastrale flasin për territor të pastër shqiptar” tha Lenjani.

Lenjani tha se nuk e ka menduar se do të shkoj edhe ky vit dhe Karaqeva nuk do të jetë në tavolinën e bisedimeve Kosovë – Serbi. “Delegacioni kosovar është dashur vazhdimisht të bëjë trysni për këtë pikë sepse vetëm në këtë mënyrë Serbia detyrohet dhe obligohet të flas për Karaqevën”.

Sipas Lenjanit komuna e Kamenicës duhet të bëjë trysni në organet qeveritare dhe në Parlamentin e Kosovës që ta zgjidhë kontestin kufitar, ndryshe ky vend do të mbetet i izoluar, i braktisur dhe i pazhvilluar në shumë sfera mendon Lenjani./rajonipress/