Legjenda e hendbollit gjilanas, Dukagjin Azizi: Shuarja e Dritës është krim ndaj shumë gjeneratave

Gjilan – Me shuarjen e KH Drita shumë dashamirë të hendbollit të Gjilanit e më gjerë janë zhgënjyer me ardhjen e “bardhekaltërve” në këtë gjendje për tu mbyllur një klub 60 vjeqarë, i cili në mesin e saj ka pasur suksese të jashtëzakonshme dhe hendbollist të cilët na kanë bërë krenar me paraqitjet e tyre kudo që janë paraqitur.

KH Drita nuk është shuar as atëherë kur pushteti serb kishte uzurpuar palestrat sportive, duke i detyruar hendbollistët të luajnë nëpër cimente të fushave të shkollave të Gjilanit, por fatkeqësisht sot pas 23 vite të lirisë së Kosovës, ky klub me nam jo vetëm në hendbollin e Kosovës por edhe më gjerë – i vendoset dryni. Ish-hendbollisti, Dukagjin Azizi, me një karrierë të madhe hendbollistike, i cili plot 10 vite i mbrojti ngjyrat e Kombëtares së Kosovës në arenën ndërkombëtare dhe i cili karrierën e tij të hendbollistit e zhvilloi në klubet më të mëdha të Kosovë, duke fituar tituj e Kupa, është i shokuar nga kjo gjendje e klubit të Dritës.

Për ish-majtakun, Dukagjin Azizi, shuarja e KH Drita është e pa pranueshme dhe shumë e dhimbshme. “Nuk po mundem të besoj, kjo është një krim ndaj shumë gjeneratave të cilët u rritën, kontribuuan e derdhën djersë për këto ngjyra të klubit. Këtë vendim nuk na fal askush që t’ju mbyllet klubi shumë talenteve, dhe të mbetet hendbolli i Kosovës pa njërën ndër klubet më të mira në Kosovë. Duhet dhënë përgjegjësi ata që e sollën klubin në këtë gjendje, ky moment është për të qajtur, i gjithë opinioni hendbollistik në Gjilan ka mbetur pa fjalë – në çdo mes komentohet se si është e mundur të shuhet hendbolli në qytetin që dikur ishte në zë me rezultatet e saj” , thekson i mërzitur ish-hendbollisti, Dukagjin Azizi.

Azizi tani 39 vjeçar, karrierën e tij e filloi si 16 vjeçar në KH Drita ku u formua si hendbollist, duke vazhduar karrierën në Prishtinë, ku u shpall dy herë kampion i Kosovës dhe 2 herë fitues i kupës, me pas ishte pjesë e Kastriotit të Ferizajit ku u shpall një herë kampion i Kosovës dhe dy herë fitues i Kupës së Kosovës, me Besen e Pejës tri herë kampion i Kosovës po aq edhe fitues i kupës së Kosovës, ndërsa me Kosovën e Vushtrrisë ishte shpallur nën-kampion. Azizi për afër një viti karrierën e tij të hendbollistit e kishte sprovuar edhe në Gjermani. Azizi i cili ishte ‘enigmë’ e pa zgjidhur për shumë portiere, ka bërë apel tek bizneset gjilanase dhe Komuna e Gjilanit, që ti dalin në ndihmë klubit në këto momente të vështira.

“KH Drita është i qytetit të Gjilanit, për hir të së kaluarës dhe shumë gjeneratave të cilat sakrifikuan për të mirën e hendbollit gjilanas, i bëjë të gjithëve apel që ti dalin në ndihmë ish-klubit “gjigant”, KH Drita. Kjo përpos që është mirë që të ruhet historia e klubit, së bashku me ju t’ia kthejmë identitetin klubit këtë e meritojnë qytetarët e Gjilanit”.

Azizi ka theksuar se shumë shpejtë do të mblidhen shumë hendbollist të gjeneratave të ndryshme për të rishikuar dhe protestuar kundër mbylljes së klubit, i cili dha djemtë më të mirë të qytetit – duke na bërë krenar të cilët ishin idolët tanë dha na bënë për vete duke u marrë me lojën e hendbollit./rajonipress/