LDK, përfundimisht kundër vendeve të rezervuara për minoritetet

Lidhja Demokratike e Kosovës, përfundimisht është kundër vendeve të rezervuara për komunitetet jo shumicë. Së paku kështu shkruan në profilin zyrtar në rrjetin social Facebook, kryetari i LDK-së, Isa Mustafa.

“Vendet e rezervuara nuk janë opsion i LDK-së në asnjë alternativë. LDK konsideron se Kosova ka përmbushur obligimet e saj për dy mandate të vendeve të rezervuara për komunitetet që nuk janë shumicë në Kosovë, të parapara me Pakon e Ahtisarit (dhe të sanksionuara me Kushtetutë për këtë periudhë kohore) dhe se Kuvendi i Republikës së Kosovës, përfshirë edhe deputetët nga komunitetet, në bashkërenditje me faktorin ndërkombëtar në vjeshtën e vitit 2012 ka vendosur që vendet e rezervuara t’i shndërrojë në vende të garantuara dhe atë 10 për komunitetin serb dhe 10 për komunitetet e tjera që nuk janë shumicë. Garantimi i njëzetë vendeve për komunitetet joshumicë nga 120 sa numëron Kuvendi i Republikës së Kosovës, është tregues i vullnetit të mirë për integrim të tyre në institucionet e Republikës së Kosovës”, shkruan Mustafa.