LDK: Keqqeverisja e Thaçit merr fund më 8 qershor

Viti – Lidhja Demokratike e Kosovës dega në Viti ka vazhduar me aktivitete elektorale në shpalosjen e programit zgjedhor me anëtarët dhe simpatizantët e saj.

Tubimi i sotëm është mbajtur në Kabash në nëndegën e LDK-së, ku të pranishmëve iu është drejtuar kryetari i degës së LDK-së në Viti, njëherit edhe kryetar i komunës Sokol Haliti duke theksuar nevojën e ndryshimit të qeverisjes aktuale, që sipas tij nuk është treguar efikase. “LDK në krye me akademik Isa Mustafën, është e vetmja alternativë e cila mund ta mposhtë keq qeverisjen e deritanishme dhe PDK-në e Hashim Thaçit. Qytetarët e Vitisë dhe mbarë Kosovës meritojnë një trajtim më të mirë dhe këtë e mundëson vetëm qeverisja e udhëhequr nga LDK”, është shprehur Haliti, raporton rajonipress.

Kurse Faruk Nura kandidat i LDK-së për deputet në Kuvendin e Kosovës, ka kërkuar vetëdijesim të elektoratit për përkrahjen e kandidatëve nga komuna e Vitisë, sepse edhe Vitia ka njerëz intelektualë që mund të përfaqësojnë atë edhe në kuvend, por pse jo edhe në Qeverinë e ardhshme me kryeministër Isa Mustafën. Duke ftuar për përkrahje drejt fitores, Musa Misini poashtu kandidat për deputet ka thënë se Hashim Thaçi e ka humbur besimin si tek ndërkombëtarët ashtu edhe te qytetarët e Kosovës dhe për këtë do të ndëshkohet nga qytetarët të cilët do ti japin fund kësaj keq qeverisje me 8 qershor.

Edhe Kosovare Azemi kandidatja e vetme nga dega e LDK-së në Kllokot, ka theksuar se ajo ka kandiduar me qëllim që ta mposht kauzën e madhe të Hashim Thaçit. Ajo me këtë rast elektoratit të Kabashit iu ka drejtuar me fjalët se në Kabash mbizotëron vetëm një parti, e ajo është LDK e cila ka njerëzit më të mirë dhe më intelektualë”./rajonipress/